Ka Congress ka don 30 ngut ki khmat thymmai ki bym don dak sniew: Pala

Shillong, Rymphang, 10: Ka Congress ha ka sngi Thohdieng ka la ong ba ka rai ban ïakhun ïa ka Elekshon sha ka Iingdorbar Thawaiñ ka Jylla da ka jingdon palai 30 ngut ki dur khmat ba thymmai ki bym pat don ïa kino kino ki dak sniew bad kiba don ïa ka thong na ka bynta ka Constituency jong ki.
Ka Party ka la ai jingshahniah ha ki samla jong ka Meghalaya ki ban ïarap ïa ka party ba kan wanrah biang ïa ka burom jong ka Jylla namarba ki durkhmat barim kiba bamsap ki la dung nadien ïa ka party tang namarba ki rhah ïa ka pisa bad ka bor.
“Ki durkhmat kiba rim ki la pyndonkam ïa ka party ban poi sha ka bor bad ban pynurlong ïa ki jingangnud ba pynmyntoi ïa ki kam shimet jong ki katba ki dang don ha ka bor. Hynrei ynda ki la mih na ka party ki la leit ban pynïasoh bad ka party na Bengal bad kiwei kiwei de ki party tang ban pynurlong ïa ka jingrhah spah lada wan ha ka bor,” ong u AICC Incharge ka Meghalaya u Manish Chatrath.
Ka party ka la ong ba ki durkhmat ba thymmai jong ka Congress ki dei kiba dang long bad kin sa ïakhun ha ka elekshon sha ka Iingdorbar Thawaiñ ka Jylla ha ka sien banyngkong eh. Ka long kumba ki samla lud kin sdang ïa ka jingim ba nyngkong eh jong ki.
Ki durkhmat ba thymmai ki dei ki bym pat donkti ha ka bamsap, bun na ki, ki dei kiba la biang ka kyrdan pule, ki dei kiba la kynjoh ïa ka rta kaba naduh 26 haduh 46 snem bad kiba la angnud ban ïakhun na ka bynta ban pynlong ïa ka Mehalaya 5 Star, bad ka thong ban trei na ka bynta ka jylla.
U President jong ka Meghalaya Pradesh Congress Committee (MPCC) u Bah Vincent Pala u la ong ba ka Meghalaya ka donkam ïa ka jingkylla.
“Ka Meghalaya ka donkam ïa ka jingsdang ba thymmai. Ka Meghalaya ka donkam ban lait na ka jyrsieh bamsap bad dei tang ka Congress ka ban ai jubab ïa baroh ki jngeh kiba ïatakhuh hapoh kane ka jaka ba itynnat jong ka jylla Meghalaya,” u la ong.