Ka Conference kan peit ïa ki Polisi, ka jingbei tyngka bad ka jingsaiñdur kaba thmu kyntiew ïa ka India

New Delhi, K’ Lyngkot 07: Ka National Textiles Ministers’ Conference 2026, kaba pynlong da ka tnat Textiles, ha ka jingïatreilang bad ka Sorkar Assam, kan sdang ha ka 8 tarik u Kyllalyngkot ha Guwahati, Assam. Kane ka Conference kaba ar sngi ka dei ka ban pynlong hapoh ka phang “India’s Textiles: Weaving Growth, Heritage & Innovation”, kaba wanrah lang ïa ki Myntri kiba dei peit ïa ka kam shna jaiñ bad ki ophisar na ki jylla bad ki Union Territory na baroh kawei ka ri.
Kane ka Conference kaba ar sngi ka thmu ban ai ka rynsan na ka bynta ki jingïakren shaphang ki polisi, ka jingbei tyngka, ka jingpynneh ïa ki kam, ka jingshalan mar, ka jingkyntiew ïa ki jingdon jingem, bad ka jingkiew ka teknoloji kaba ïadei bad ka kam pynmih jaiñ. Ka ïahap bad ka jingthmu jong ka Sorkar ban kyntiew ïa ka India kum ka jaka pdeng jong ka kam pynmih jaiñ jong ka pyrthei shuwa u snem 2030, da kaba peit bniah ïa ka jingkyntiew ïa ka jingshalan mar, ka jingai kam, bad ka roi ka par ïa baroh, katkum ka nongrim jong ka “VikasBhi, Virasat Bhi”.
Ka bynta kaba nyngkong ha ka 8 tarik u Kyllalyngkot 2026 kan don ka jingïashim bynta da u Myntri Sorkar Pdeng ba dei khmih ïa ka tnad Textiles, Giriraj Singh, u Myntri Rangbah ka Assam, Dr. Himanta Biswa Sarma, U Myntri Khynnah ka tnat Textiles Pabitra Margherita bad kiwei kiwei ki kynrem ki lyndan. Ka bynta kaba nyngkongkan don ïa ka Exhibition bad Pavilion, kaba pyni ïa ka bor jong ka India ha ka kam pynmih jaiñ, ka jingsaiñdur thymmai bad ka dustur kaba riewspah.
Ka Conference kan peit ïa ki bynta kiba kongsan kum ki jingdon jingem bad ka jingbei tyngka, ka jingpynïar ïa ka kam shalan jaiñ jong ka India, ki mar ba donkam bad ki ksai, ki Technical Textile bad ki New-Age Fibre, bad ka jingpynneh bad jingkyntiew ïa ki kam thaiñ jaiñ da ka kti. Yn peit bniah ïa ki sienjam ba kyrpang kum ki PM Mega Integrated Textile Regions and Apparel (PM MITRA) Park, ka jingpynneh bad ka jingïada ïa ka mariang, ki technical textile, ka jingsaiñdur thymmai bad ka jingkyntiew ïa ki kam.
Ki Myntri bad ki ophisar na ki jylla bad ki Union Territory na kylleng ka ri kin ïawan ïashim bynta bad pyni ïa ki rukom treikam ba bha tam, ki jingeh bad ki jingai jingmut na ka bynta ki polisi kiba thmu ban kyntiew ïa ka kam shna jaiñ ha ki thaiñ bad ki distrik bapher bapher.
Ka conclave halor ka phang “Strengthening and Empowering the Textiles Sector of the North-Eastern Region of India” kan long ha ka 8 tarik u Kyllalyngkot 2026, ha kaba ki myntri kiba dei khmih ïa ka kam shna jaiñ na ki jylla ka thaiñ shatei lammihngi, ki dkhot ka parliament bad ki ophisar na ka Sorkar Pdeng bad ki Sorkar Jylla kin ïawan ïashim bynta. Ka Conclave kan peit bniah ïa ka jingplie ïa ki lad kiba don ha ka jaiñ silk na ka thaiñ shatei lammihngi, ki jaiñ ba thaiñ da ka kti, ki mar ba shna da ka kti, bad ki jaiñ ba shna na ki siej, da kaba ban jur halor ka Eri, Mugabad Mulberry silk, ki kam ba long khlieh da ki kynthei, ka jingpynïaid ïew bad ka jingïoh bynta ha ki ïew.
La khmih lynti ba ka National Textiles Ministers’ Conference kan pynkhlaiñ ïa ka jingïatreilang hapdeng ka Sorkar Pdeng bad ki Sorkar Jylla bad wanrah ïa ka rukom treikam kaba shai na ka bynta ka kam shna jaiñ kaba lah ban ïakhun, kaba ïaineh bad kaba ai bynta lang ïa baroh.