Ka CM Impact ka dei tang ka kot ban ïarap ïa ki samla pule ba pynkhreh eksam : Rymbui

Shillong, Naiwieng 30 : U Myntri ka tnad Pule Puthi ka sorkar jylla Bah Lahkmen Rymbui u la pynphai nia kylla ïa kito kiba kynthoh pyrshah ïa ka CM Impact Guidebook da kaba ong ba kitei ki jingkynnoh ki dei tang ban ïalam bakla ïa ki paidbah khamtam ïa ki samla pule.
Da kaba pynpaw ba ka CM Impact ka dei tang ka kot ïarap ïa ki samla pule, u Myntri u ong ruh ba kane ka kot kam dei satia kaban treikam kum ka kot pule.
Na ka liang u Myntri u la ïai ban biang da kaba ong ba ka long kaba bakla ban ong ba kane ka kot ïarap ne Guidebook kan ktah kylla ïa ki samla pule.
Shuh shuh u la bynrap biang da kaba ong ba ki guidebook ki dei tang ka kot ïarap kaba thmu ban ïarap ïa ki khynnah ban praktis na kaei kaba ki la dep ban pule bad ïoh jinghikai na ki kot pule.
U Myntri u ong ruh ba ka thong jong kane ka guidebook ka long beit tang ban plie lad ïa ki samla pule ba kin pyntikna ïalade la ki la ïoh bat lut neem ïa ki jinghikai kiba ki ïoh pdiang ha ki kamra klas. Kumta, u ong ba kane kan ïarap ïa ki ban lah pynkhreh bha shuh shuh na ka bynta ka eksam.