Ka CM-Elevate kan ïarap ban kyrshan ïa 20,000 ngut ki nongseng kam khaïi ha ki 5 snem

Shillong, Nailar, 17: U Myntri Rangbah ka Jylla Conrad K Sangma ha ka sngi Ba-ar, ula pynbna paidbah ïa ka flagship program ba thymmai jong ka Sorkar Jylla ba la ai kyrteng ka ‘Chief Minister’s ELEVATE Program’, kaba dei ka single window ka ban khmih ïa baroh ki jingdonkam jong ki nongsengkam hapoh ka Jylla.
Haba pynbna ïa kane ka prokram ha ka jingrakhe Sngi Laitluid ba 77 ka Ri, u Conrad ula ong “Nga kmen eh ban pynbna ïa ka flag ship prokram ba thymmai jong ka Sorkar Jylla ban aikam aijam bad pynkupbor ïa ki samla. Kane ka prokram kan dei kaba khot Chief Minister’s ELEVATE Program bad kan dei ka single window ka ban khmih ïa baroh ki jingdonkam jong ki nongsengkam haba seng kam”.
Ha kane ka prokram, ka Sorkar kan ai jingkyrshan haduh 35-75% sha ki nongsengkam shimet, ki kynhun, ki seng na ki shnong ki thaw bad ki Dorbar Shnong ba kin sdang ïa ki kam ki jam.
Kane ka prokram ka kynthup ruh ïa ka jingthied ïa ki kali kit mar rep kynthup ki mini truck, ki kali kit nongshangkai pyrthei kynthup ki caravan, ki kali rem dor, ki kali electronic bad minibus, ka jingshna ïa ki warehouse, common facility centre, green tourism villas, ka jingshna ïa ki polyhouse ka horticulture bad ka jingshna ïa ki dairy unit bad ki farm ri sniang, syiar bad ki blang.
“Ki project kum ka jingshna ïa ki cinema hall, health club, music studio, ki kam ïalehkai ruh lah ban leh eiei hapoh ka CM-ELEVATE prokram” ula pyntip.
“Ngi buh thong ban kyrshan kumba 20,000 tylli ki business hapoh kane ka prokram ha kine ki san snem ban wan” ula bynrap.
Ula ong ruh ba ka Sorkar kan sa ai subsidy bad ka jingïatreikam ban lah pynïaid ïa ki kam ki jam da ka jingïatreilang bad ki Bank.