Ka Central University Entrance Test (CUET) kan pynkulmar ïa ki samla pule mynta u snem

Ka jingshim rai jong ka Sorkar Pdeng ban pyntreikam noh khala-khala ïa ka jingpynrung College/University ïa ki samla kiba pule ha Class XII (Higher Secondary Level) wat haba khlem pat pynbna satia wat tang ïa ka result Class Xii jong ka MBOSE ruh kan wanrah ym tang ki jingkulmar jingmut ïa ki samla pule hangne ha Meghalaya hynrei kan wanrah ruh ka jingartatien bad ka jinglong kynrum kynram ha ki kmie ki kpa, ki nonghikai haduh ki bor pynïaid skul bad College naduh sor haduh nongkyndong ruh kumjuh ha une u snem.
Katkum katei ka rukom pynrung College thymmai (new admission system), kino kino ki khynnah kiba la pule ha Class-XII ha u snem 2021-22 kiba kwah ban dang bteng biang ïa ka jingpule jong ki ha ki College ha ka kyrdan BA/BSc/B.Com bad kiwei kiwei mynta u snem, ki dei ban pynrung kyrteng shwa noh hapoh ka 6 tarik, Jymmang, 2022 lym kumta kin duh-ei noh ka jingpule jong ki mynta shi snem, kam pher, la ki pas ne pheil ïa ka Exam Class-XII ba la pynïaid da ki bor pynïaid jong ka MBOSE,Tura bad ka ban sa pynbna ïa ka ha ki bnai Jylliew ei ei.
Ka jingthmu jong katei ka Test ka long ruh ban pynduna ïa ka jinglutphut jong ki kmie ki kpa ïa ka bai eksamin, hynrei, kane kan nang pynlong pynban ka jinglutphut shuh shuh arshah lai shah ïa ki kmie ki kpa. Katkum katei ka Test, ka bai pynrung kyrteng kan long T. 550/ shisien leh Test mynstep bad T. 1100/ arsien leh Test, kata, mynstep bad janmiet.
Nalorkata, ki khynnah ki ladep siew lypa ruh T. 1200/1300 tyngka ka bai ïaleh eksamin jong ka MBOSE ha ka por ba ki la pyndap phom ban ïaleh ïa ka Class XII. Sa mynta pat kin hap siew biang T. 1100/ ban pynrung kyrteng ïa lade ha katei ka Test lym kumta kim ïoh pule shuh mynta u snem, kin hap pep skul noh shwa mynta shi snem.
Imat, katkum kitei ki kyndon jong ka CUET, lada u/ka khynnah ka pheil ïa ka Class-XIIha ka MBOSE hynrei, ka/u pas pat ïa katei ka Test, kin ïoh bteng beit ban leit pule ïa ka Degree level. Hynrei, lada u/ka pass bha ha ka eksamin Class-XII jong ka MBOSE hynrei kim ïoh pynrung kyrteng pat ïa lade ha ka CUET hapoh 06-05-2022,kata, kin duh-ei kha-ma-kha ïa ka jingpule jong ki mynta u snem 2022.
Ki don bun bah hangne ki jingkynthoh halor ka jingbym ler bad jingtlot jong kane ka Sorkar MDA ha Meghalaya khamtam ha ka liang ka thoh ka pule bad ka jingnang jingstad ba la ïalam da kata ka party NPP kaba baroh baroh ki nongïalam jong ngi ki leit noh ïap lut sha ka. Ha ka jingshisha, ka pule puthi ka dei ka mat ba ïa donbor lang hapdeng ka Sorkar India bad ka Sorkar Jylla (Concurrent List). Ka Sorkar Jylla ka don la ka jong ka bor ban pyni lada kam sngew ïahap ïa ki aiñ ba la thaw da ka Sorkar India (kum ha Karnataka kim pdiang). Hynrei,kane ka Sorkar MDA ha Meghalaya pat,mar ïa pynmih hukum na Delhi,wut wut khlem pynslem shuh ka pdiang beit khlem da pyrkhat shuh ïa kaba bha ne kaban ktah ïa ki samla pule jong ngi.
Ki dei shisha tang kum ki ñiangkohnguh jong ka Sorkar NDA na Delhi. Ym tang kata, ka Sorkar ka dei ban pyrkhat ruh ïa ka burom bad ka ijot jong MBOSE, ka bor kaba ju pynïaid ïa ka eksamin Class-XII ha Meghalaya namar kam dondor ne don iktiar shuh bad kam don jingmut hi ruh (useless and meaningless) ba kan dang don ka eksamin Class XII jong ka MBOSE haba ki College kim pdiang ne ithuh shuh ïa ki syrnot bad marksheet jong ki khynnah pule kiba pass Class-XII na MBOSE. Lada kim pas ïa kata ka CUET kim ïoh rung College shuh. Lada ka long ha kane ka rukom, ka Sorkar bad ka MBOSE ki la dei ban pynduh pyndam noh ïa ka eksamin Class XII namar kadei tang ka jingpynlut kai, ka jingpynlut ei ïa ka por, ka bor bad ka pisa jong ki samla pule bapli namar ym don ba ithuh shuh (not recognised) da ki bor pynïaid College naduh mynta u snem.
Kumno ki kmie ki kpa ki sngew halor kane? Kumno ki sengbhalang bapher bapher kin ïa pyrkhat lem halor kane ka jingeh bad jingleh kyrkieh hak- dak jong ka sorkar khlem pyrkhat shuh ïa ka lawei jong ki khynnah pule? Kumno ki paidbah ba bun ki pyrkhat ïa kane ka Sorkar kaba la pheil lut nadong shadong ha ka liang ka pule puthi kat haduh ba ki kynhun nonghikai bapher bapher ha ki kyrdan bapher bapher ki la ïa pynlong lut ki jingïakhih bapher bapher hynrei, kane ka Sorkar pat, ka nangleh kyllut bad leh kput pynban ïa ki? Katba dang don hi ‘ ki khleiñ la thang ki jwat la bam’ ha kane ka Sorkar, ka Jylla jong ngi kan nang ngam nang ngam bad nang sniewdur shuh shuh katba nang mih ki sngi ki snem.
Ka ktien ka ong,”Na u dek ha ka ding syndon puk” mynta. To ïa kyndit bynriew noh shwa ban dier noh ka por ba kordor.