Ka CBI ka long kum u Tuta set ruh, kat uba synshar ha Delhi u khyrwait shabi : VGK Kynta

Shillong, Naiwieng 25: Hadien ba ka sorkar Meghalaya bad Assam ka pynpaw ïa ka jingkwah ba ka kynhun tohkit ka sorkar pdeng la ka dei da ka National Investigation Agency (NIA) ne ka Central Bureau of Investigation(CBI) ka dei ban shim tohkit halor ka jingjia shah siat ïap ki san ngut ki Khasi ha ka shnong Mukroh ha ka 22 tarik ha ka ktang suloi ki Pulit Assam, uwei na ki nongsaid aiñ ba la ih bha ha kane ka kam u Bah VGK Kynta u la ong ba ka Supreme Court (SC) ha ki snem kiba la dep ka la don ka jingong jong ka ba CBI ka long kum u Tuta ba shah set ruh bad kat uba bat ïa u lakam synshar ha Delhi u khyrwait shabi.
Haba kylli kaei kaba u ïohi ïa ka jingthmu ban aiti tohkit CBI ne NIA ïa ka jingshah siat ïap ha Mukroh, u Bah VGK Kynta u la ong ba kane ka jingleh ka sorkar ka long tang ka jingleh lapmiet bad ka jingkwah leh lutphut ban ïoh her Delhi namar ha ka jingshisha ki kyndon aiñ kiba shai ki don ba lada don kano kano ka kam sniew wat lada dei ka jingtuh kaba tang shityngka ruh haba la don ka jingujor ejahar ki pulit ki lah ban kem marmar katno tam lei ïa kiba pynïap haduh san ngut ki mynsiem briew.
“Ka SC ha ki rai bishar jong ka ha ki katto katne snem ka la ong ba ka CBI lei ka long kum uta u Tuta shah set ruh ba kat uba bat ïa uta u ruh(lakam synshar ha Delhi) u khyrwait shabi katba mon ïa ka, namarkata, balei te ka sorkar kan pynslem hynrei ka dei ban shu kem beit namar ka aiñ ka don ka aiñ ka kdew shai ba haba don ka kam sniew ki pulit ki lah ban kem beit”, u la ong.
“Nga kwah ban kylli ki la register ne em ïa ka ejahar lada la don balei kim leit kem mardor bad balei ka shimpor ban leit kem namar kine ki pulit Assam ki wan siat ïap ïa kine ki briew ha u pud u sam ka jylla Meghalaya dei halor kane ka nongrim ba ki don hok ban kem ïa kine ki pulit,” u la bynrap.
U la ong ruh ba ba ka sorkar Meghalaya ka dei ban leh tyngeh ïa kane bad ban kem mardor ïa ki pulit kiba siat ïap ïa ki Khasi bad ba dei ban set ha ki along ka jylla Meghalaya.
Haba la kylli halor ka jingmih ka jingdawa hair shuki ïa u Myntri kam poh ïing hadien ba ka mih kane ka jingshah siat, U Bah VGK Kynta u la ong ba ha ka jingshisha u dei hok ban hiar shuki kum ban shim jingkit khlieh hynrei u ong ba kane ka jingbym treh hiar shuki ka pyni ïa ka jingkhwan bor ki nomngïalam jong kane ka juk.
U la ong ruh ba ka jinglong jong ngi kum ka jaidbynriew kaba shu shit kloi bad daitthah kloi ka pynlong ruh ba ngim ju ïoh kheit ïa kino kino ki soh kiba ngi angnud ban ïoh. “Peit kaei kaba la jia ha u snem ba la dep ha kaba u Bah Cheristerfiled u shah siat ïap hynrei mynta kane ka kam ka shu jah klep wat lada ha kito ki por ka long ka mat ïakren kaba shit bha bad ngam kwah ba kane ka jingjia ha Mukroh kan long kum kane kaba la jia ïa u Bah Che,” u la ong.