Nongpoh, Lber 23: Shibynta ban ailad ïaki khun samla jong ka dong Ri-Bhoi ban shim bynta haki rynsan bapher bapher naduh ka jingïakop rwai, shad, siat khnam bad kiwei kiwei ryngkat jing pynbyrngia bapher bapher, ka Umsning Town Dorbar kan pynlong da ka tamasa Carnival bad ka fete ba lai sngi lynter naduh ka 24-26 Lber 2022.
Haba kren sha ki lad pathai khubor mynta ka sngi u Bah Rocky Kylla Chairman ka Umsning Town Dorbar u la ong ba katei ka tamasa yn sa pynlong haka rukom kaba kham pher ka ban sdang naduh lashai ka sngi ha kaba kin don shibun ki jingïakop, ki jingpyrbyrngia naka bynta ki khyllung bad rangbah ryngkat ki jingïalehkai bapher bapher ba ki paidbah ki lah ban wan sakhi bad shim bynta ha madan ïalehkai ha Umsning.
Katei ka tamasa kan long ruh kum ka rynsan ïa kiba bun ki khun samla jong ka dong Ri-Bhoi ba kin ioh ban shim bynta haki jingïakop bapher bapher ba kum ka UTD kala pynkhreh ryngkat ka jingïatreilang bad ki samla jong ka thaiñ Umsning, khnang ba ki paidbah khamtam ki khun samla kin ioh ban lehkmen leh sngewbha ryngkat ka jingmaham ruh ba kim dei ban pynmih kano kano ka huri hura.
