Nongpoh, Nailar 11: U Bah Mayral Born Syiem haba kren haka jingïalang ban sam skhim pynroi haka shnong Umden Manipur mynta ka sngi u la ban jur halor ka jingdonkam ka C&RD Block haka thaiñ Umden ban pynsuk ïaki paidbah bad ban pynjan khamtam ïaki nongïalam shong haka jingtreikam bad ki kam shnong kam thaw bad kiwei kiwei ki jingdonkam kumba ki rangbah shnong na katei ka thaiñ ki shem jingeh haka leit ka wan namar ka jingjngai ka lynti shaduh Umling khamtam ki shnong kiba naka thaiñ Umden.
U la ong ruh ba kumba long mynta ka Umling C&RD Block ka dei kawei naki block ha Ri-Bhoi kaba la kdup bun tylli eh ki shnong kiba don kumba 128 tylli haba nujor bad kiwei kiwei bad kane ka la buh jingeh ïaki paidbah bad kumjuh ruh ka ophis u BDO ha Umling Block ban pyntyllun ïaki kam ki jam.
Ka thaiñ Umden kala donkam eh ïaka C&RD Block ban pynjan ïaki paidbah halor ka jingtreikam bad ki Block khamtam ki nongïalam shnong kiba hap ban leit mih man ka sngi ban pyndep ïaki kam shnong kam thaw, hynrei kumba long mynta ki ba bun ki paidbah khamtam naki thaiñ nongkyndong ki hap ban pynlut ka nong sngi, ka bai lynti ka bai bam bai dih tang ban pyndep ïaki kam ki jam bad kane ka buh jingeh kaba khraw bad pynsyrwa ïaka por bad ka pisa ki paidbah.
U la pynpaw ruh ba kum u MLA ka thaiñ u dap da ka jingsngewkhia halor ka jingud jong ki paidbah ban pyndep ïaki jingdonkam jong ki bad ka ophis u BDO kaba don shaduh Umling bad jngai haka leit ka wan nalor ka lynti ba khohruh khohram.
U la ong ruh ba kum u MLA un dang ïaid buddien bad ka sorkar khnang ba katei ka jingangnud kan urlong ha katei ka thaiñ naka bynta ka jingsuk bad ka jingmyntoi jong ki paidbah ba bun ba lang bad donkam ruh ka jingkyrshan lang jong ki paidbah naduh ki nongïalam shnong, ki sengbhalang ban pynurlong ïa katei ka jingangnud.
Ha katei ka sngi naka liang u MLA ka Nongpoh u la sam ruh ïaka Work Order naka bynta ban pynbha bad pynheh ïaka iing dorbar haka shnong Umden Manipur haka jingdonlang ki nongïala shnong, ki longkmie bad la ioh ruh ban aiti ïaki shuki sha ki longkmie nalor ka jingkular ban wanrah shuh shuh kiwei kiwei ki kam pynroi ha katei ka shnong naka bynta ka jingbit jingbiang jong ki paidbah.
