Shillong, Nohprah 23 : Ka Bharatiya Janata Party (BJP) mynta kala ïaid sha khmat ban wad kyrtong na ka bynta ka Garo Hills Autonomous District Council (GHADC) elekshon ka ban sa long, da ka jingthmu ban pynieng ha kiba bun ki Konstitwensi, ong u nongïalam ka BJP uba dei ruh u MLA ka Pynthorumkhrah u Bah A.L.Hek.
Haba ïakren bad ki lad pathai khubor u Bah Hek u la ong, “Ngi la ïaid shakhmat ban wad bad ithuh ïa ki kyrtong ha baroh ki konstitwensi.Ngi dang trei shitom ban ïakhun ha kane ka elekshon ban wan bad lada ym dei na baroh ki konstitwensi, ngi khmih lynti ba ngin ïakhun ym duna ïa ka 60-70 percent na ki seat.”
U la bynrap ba ki don shibun ki la pyrshang ban wan sha ka party, hynrei ki jingpynbna kyrtong ba pura ki dang sahteng bad shen yn sa leh.
“Ki don shibun kiba la wan sha ka party, hynrei ka dang kloi palat ban ong ba mano un dei u kyrtong, namar ba ngim shym pat la pynbna ïa ka kyrteng jong ki kyrtong,” ong u Bah Hek.
