Ka BJP ka da bishar bha ïa uno u kyrtong uba kham ïoh jingshahniah na ki paidbah: Michael Kharsyntiew

Shillong, Naiwieng, 11: Ka jingïaknieh tiket hapdeng u Bah Michael Kharsyntiew bad u Bah M. Kharkrang na ka Bharatiya Janata Party (BJP) ban aireng ïa ka elekshon sha ka Iingdorbar Thawaiñ ka ban sa long ha u snem 2023 na North Shillong Constituency ka dang don hapdeng ka jingpeit pyrman jong ka party.
U Bah Michael Kharsyntiew u la long u dkhot jong ka BJP la hynñiew snem kynthih hadien ba u la aireng ïa ka elekshon sha ka Iingdorbar Thawaiñ ha u snem 2018 na Umsning Constituency na ka tiket jong ka BJP bad uba dang ïai neh haduh kine ki sngi bad ka BJP katba u Bah M. Kharkrang u dei uba dang shu pynïasoh mynta u snem 2022 hadien ba ula shongthait na ka kam kum u Pulit Ophisar.
Ha ka jingïakren bad u nongthoh khubor u Bah Michael Kharsyntiew, u la ong, “ha ka jingïaid lynti kum u dkhot ka BJP la hynñiew snem kynthih, kum u riewsaiñ pyrthei bad kum u nongtrei jong ka party nga la trei na ka bynta ki paidbah bad nga dang dei ruh u dkhot uba nga da ieid ïa ka party haduh kine ki sngi.”
“Nga sngew ba ka jingdon slem jong nga ha ka party, ka party kan sa peit bad ka party jong ngi kam peit bahaing hasem ne kam peit paralok ban ai tiket, hynrei ki da bishar ïa ka jingïadei jong u kyrrtong bad ki paidbah bad uno u kyrtong uba kham ïajan bad uba kham ïoh jingshahniah na ki paidbah,” la ong u Bah Kharsyntiew.
“Uba kham jan sha ki paidbah uta hi u briew uba ki paidbah kin jied. Ka North Shillong Constituency ka dei ka jabieng jong ka jylla bad u paidbah u tip bha ïa kata. Ka kam ban jied ïa u nongmihkhmat ka long tang san snem bad kam dei ka kam ban thung syiem. Ka politik kam dei tang ka bynta kiba don kyrdan. Haba phi angnud ban shakri, phi dei ban shakri da ka jingsngewrit,” la ong u Bah Kharsyntiew.
“Nga kum u kyrtong nga la shim da ka rai kaba la pyrkhat sani bad kam dei kaba shu leh shongshit lane ban shu rai kyrkieh bad nga la ïakhun teng ïa ka elekshon ha u snem 2018 bad na ka jingshah rem mynta nga la kham trei shitom ban pynjanai ïa ka lynti kaba nga ïaid,” la ïathuh u Bah Michael uba la pynkhreh bha ïalade ban aireng ha kane ka elekshon.
U la ïathuh ba ka jingmih madan biang jong u ha kane ka kynti ka dei namarba katkum ka jingsngew jong u, ka jingdon jong ki samla ha ka jylli jong ka saiñpyrthei kan dup lah ban wanrah ïa ka jingkylla ha kiba bun ki liang.
U la ong ba ka jingpynkhreh jong u ban aireng na North Shillong Constituency ka long namarba kum u riewmadan u dei uba ju don bynta ha ka kam shakri paidbah namar ka jingïakynduh marmet bad ki paidbah kiba shem jingeh manla ka sngi. Haba kylli u la ong, “ka North Shillong Constituency ka ladep mad lut ïa ki party bad dei sa tang ïa ka BJP kaba ki paidbah kim pat ïoh mad. Ka BJP ka don la ki jong ki mat treikam kaba trei na ka bynta ka bha ka miat jong ki paidbah.”
Da kaba pynpaw ba kum u samla rangbah uba la mad bad ïohi na ing lajong ïa ka jingkyrduhkam, u Bah Michael uba la pyndep ruh ïa ka jingpule Master Degree na Kings’ College, London trei ruh shipor sha bar ri shwa ban wan phai sha la ka jong ka ri, u la ong, “nga lei nga la mad na ing lajong bad ban ïoh ïa ka kam Sorkar donkam ban ithuh ïa kiba heh kiba haiñ bad bad ka jingithuh briew (Nepotism) ka dei kaba ktah bha ïa ki samla wad kiba la biang ka kyrdan jingpule.”
“Ka jingbym ïohi jngai jong ki nongïalam ban wnarah ïa ka jingkylla ka pynlong ïa ka Sorkar Jylla ba kam lah ban shu thungkam namarba ka jingbunbriew ka la nang kharoi bad ki samla kiba la nang la stad ruh ki la nang bun. Ki samla ha kanem ka juk mynta ki dei kiba pyrkhat bha ïa la ka lawei. Hynrei kaba sngewsih ka long ha North Shillong ki don kumba 60 percent ki samla kiba trei bad kiba pule shabar ka jylla,” la pynsngew u Bah Michael.
Kumba ka long mynta ka North Shillong Constituency ka dei ka Constituency sor kaba la biang lut nadong shadong hynrei ha ka jingshem jong u Bah Michael Kharsyntiew kum u nongshong shnong ha kane ka Constituency ka koit ka khiah ka dei ka mat kaba kongsan. “Dei na kata ngi la theh bha ïa ki jingïarap sha ka Dr. H. Gordon Roberts Hospital ba kan dup lah ban ai ïa ka jingshakri kaba kham bha sha ki paidbah nongshong shnong kiba shong basah hapoh ka North Shillong Constituency bad ia ki shnong kiba marjan,” la ïathuh u Bah Michael Kharsyntiew uba long ruh u Chairman jong ka Ktiews Trust.
Ka North Shillong Constituency ka dei ka Constituency kaba don la kumno kumno mar shiteng eiei ki nongthep vote trai jylla bad ki bar jylla ki ban rai ïa ka jingjop jong uno uno u kyrtong ki don ka jingshahniah.
Kat haduh mynta, ki kyrtong kiba la pynbna ïalade ban ïakhun na ka North Shillong Constituency ki long u Bah Michael Kharsyntiew bad u Bah M. Kharkrang kiba dang ïaknieh ban ïoh tiket na ka BJP, u Sitting MLA u Bah Adelbert Nongrum, u Bah Ranson Sutnga na ka NPP, u Dr. Aman War na ka UDP, u Bah JA Lyngdoh na ka Congress bad ka Kong Elgiva Rynjah na ka Trinamool Congress.