Ka bha ba ki leit sha ïingbishar, ong u Bah Prestone halor jingbyrngem ki kynhun ïa ka kam pynbeit pud

Shillong, Jymmang 02 : U Symbud Myntri Rangbah ka Jylla, Bah Prestone Tynsong u la ong ba kito kiba byrngem ban leit sha Iing Bishar ban pyrshah halor ka jingpynbeit pud jong ka sorkar Meghalaya bad Assam ha ka kylla kaba nyngkong, ki lah ban leit ban ïoh ïa ka jingbishar.
“Ïa kaei kaba ngi la dep ban soi soskular mangi ki ong ban ïa leit sha Iing Bishar. Nga ruh nga mynjur ïa kata ba ieh kan rai ka Iing Bishar namar shwa ban ïa soi ïa ka soskular (MoU) ngim dei ki khlehbiej hynrei ngi la pule lain pa laiñ ym dei tang ki laiñ hynrei ki colon, ki semicolon, ki coma haduh fullstop ïa ki memorandum, ki kot ki sla namar naduh u snem 1972 ka jingeh ka la sdang,” u la ong haba kren ha ka jingïalang paidbah jong ka NPP kaba long ha kane ka sngi Nyngkong ha Saitsohpen, Shella constituency.
U ong ruh ba ka NPP ka ieng ha ka nongrim, kata ban leh ïa kaba dei.
Kumban shu kdew hangne, hadien ka jingbyrngem jong ka Boundary Committee jong ka KHADC ban leit ujor sha Iing Bishar ban pyrshah ïa ka jingpynbeit pud jong ka sorkar Jylla bad ka sorkar Assam ha ka kylla kaba nyngkong mynta la mih pat sa kawei ka kynhun jong ki seng kaba la byrngem lang ban leit sha Iing Bishar halor katei kajuh hi ka phang.
Katei ka jingbyrngem jong kitei ki seng ba kynthup naduh ki trai jaka, ki Hima ki shnong bad ki sengbhalang hapoh ka lama jong ka Joint Action Committee Border of Meghalaya ka dei hadien ba ka sorkar jylla ka la rai ban ym kyrtiang dien shuh ïa kaei kaba la dep ban pynbeit.
Lah ban kdew hangne, ba ka jingpynbeit pud ha ka kylla ba nyngkong kadei shwa tang ha ki 6 tylli ki jaka ba kajia na ki 12 tylli kiba don baroh.