Ka Bangkok bad kiwei ki ri SEA ki ïajan bha bad ka Delhi ha ka khaii ka pateng: Conrad

Shillong, Nailar 01 : U Myntri Rangbah ka Jylla u Conrad Kongkal Sangma ha ka sngi Saitjaiñ u la ong ba ka Bangkok bad kiwei kiwei ki ri ba shathie jong ka dewbah Asia (South East Asian Nation) ki dei kiba ïajan bha bad ka Delhi na ka bynta ka khaii ka pateng bad ki kam jngohkai pyrthei.
U Conrad u la pynpaw ïa kane haba kren ha ka 2nd North East India Festival, kaba la long ha Bangkok, Thailand. Ïa kane ka tamasa kaba lai sngi kynthih yn sa pynkut da ki jingpyninam ïa ki kolshor, ki jingrwai tynrai, ki jingbam tynrai jong ka thaiñ Shatei Lammihngi ka ban sa long ha ka sngi U Blei.
U la ong ba ka North East India bad ka South East Asian kin don ka jingïatreilang kaba jan ha ka kolshor bad ha ka jingkyntiew ïa ka ïoh ka kot haba peit ïa ka jingïasyriem jong kine ki ar tylli ki thaiñ.
“Ka jingïadei hapdeng ka India bad ka Thailand ka la long palat 2000 snem. Yn phai biang sha ka por jong u Syiem Ashoka ha ka spah snem kaba lai haba ïa ka niam Buddhism la pynsuhthied ha Thailand na India. Ka jingïadei hapdeng ka India bad ka Thailand ka la don naduh tynrai,” u la bynrap.
“Ka thaiñ Shatei Lammihngi ka kham jan bha bad ki ri ha South East Asia. Kane ka wanrah ïa ka jingïadei kaba jan khamtam ha ka jingpynher liengsuiñ,” u la ong.
Haba ïaroh ïa ka “Act East Policy” kaba long ka thong jong ka Sorkar Pdeng bad ki jylla ka thaiñ Shatei Lammihngi, u Conrad u la ong ba u Myntri Rangbahduh ka ri u Narendra Modi u la plie lad ïa ka thaiñ Shatei Lammihngi na ka bynta ban kyntiew ïa ka ïoh ka kot jong ki paidbah da kaba pun jingkieng suki pa suki khnang ban pynïajan bad ki ri kiba don ha ka bynta ba sha thie jong ka dewbah Asia.
“Nga ngeit skhem ba kane ka tamasa kan kham phaikhmat na ka bynta ka jingïadei hapdeng ki paidbah jong ka thaiñ Shatei Lammihngi bad ka Thailand,” u la ong.
U la ong ruh ba ka thaiñ Shatei Lammihngi ka la wanrah ïa ki polisi ki ban pynmyntoi ïa kine ki ar tylli ki thaiñ bad bynrap ruh ba ka jingangnud jong ka Thailand ban buh ïa ka mini FTA ha ki san tylli ki jylla hapoh ka ri India, kynthup ha Assam kan sa nang pynïajan shuh shuh ïa ka jingïadei ha ka khaii ka pateng.
“Dang shen ka Myntri Pla Tyngka ka Sorkar Pdeng ka la pynbna ba ka Sorkar India kan pyntreikam ïa ka surok Rel, ka surok, bad ka jingpynher liengsuiñ kaba kot haduh USD 17.19 billion ha ka thaiñ Shatei Lammihngi. Ïa ka Act East Policy jong ka Sorkar India la shim kylliang ruh da kaThailand kaba la pyntreikam ïa ka Act West Policy ban wanrah ïa ka jingïadei kaba jan hapdeng kine ki ar tylli ki ri,” u la bynrap.