Kaba iji bad i sait pap eh mynta ka dei ka jingmih jong ki kam sniew ba laiphewjait ha ki kot khubor ha kine ki sngi khamtam eh ki kam pynïap briew nalor ki kam thok kam shukor suda.
Ka jingmih kyllah kum kine ki jait kam imat ka dei na ka jingkynrei bad shong kulai palat eh ka pop ka sang ha manla u briew ha kane ka juk mynta. Nang bun u bynriew,nang roi ka byrsieh. Ka Hok bad ka blei ka la phet noh bak na ngi mynta sha khlaw. Shisien ba ka Hok bad ka blei ka la phet, kata, la synshar pat mynta sa da ka pap ka sang suda, ka sniew ka smeh bad ka thom bor ka leh bor suda.
Ki ong hana, ba, u Blei u la ai bor ha u briew ban long u Kynrad ha kane ka pyrthei. U briew u lah ban leh mon shisha ïa kiei kiei baroh, la ka long ban pom ne pynjot ïa ki dieng ki siej, ban siat bad pynïap ïa ki khñiang ki ksiah, ki mrad ki mreng, ki sim ki doh, ki dohkha doh pnat bad bun jait bun rukom katba u mon namarba u ïoh ïa ka bor ban long kynrad halor kiei kiei baroh (lait noh na ka bor u Blei).
Hynrei, kaba sang ïap sang im pat kaba long ruh kum ka raibi jong ka tyrud ka smer ka dei ka jingpynïap ïa ka mynsiem briew da u para briew. Kaba pynïap ïa ka mynsiem briew ka rung ka tyrud ka smer ha u nongpynïap bad lada ym lah ban sait khuid ne pyllait tyrud ïa ka, kan bam kylla ïa u nongpynïap bad ka ing ka sem jong u.
U nongpynïap briew u ju ïap bad shah bam hi ha ka tyrud namarba kane ka tyrud ka smer kam ju map ïa kiba leh ïa ka.
Ka jingshah siat ïap jong u (L) Bah Cheristerfied Thangkhiew ha ki Pulit da ka jingïatip bad sngewthuh lang bad katto katne kiba Heh jong kane ka Sorkar MDA (lada ka dei shisha) kan long ka jingma kaba shyrkhei bha namar kin nym lait na ka jingbishar bad jingpynshitom u Blei ïa ki.
U Blei u tip bha ïano ban siew kylliang ïa kaba sniew da kaba kham sniew bad kham shyrkhei ïa ki bad ka ïing ka sem jong ki. Watla kam jia hapoh shisnem ar snem hynrei hadien katto katne snem kan sa jia kylla pat ïa ki. Wat u Ramhah ruh um lah shan hynrei un pra ki thied ki jaw. Ka lak ka klur jong ki kan twa kumba twa u lumbah bad kin long ki briew bad ka ïing ka sem jong ki kiba kordit tam ha kane ka pyrthei.
Kumjuh ruh, ki ong hana, ka jingpynïap shnong dusmon khlem hok khlem nongrim ruh ka wanrah ka tyrud ka smer kaba triem ïa ka shnong ka thaw ne ka it ka Hima hadien ha bud. Ki ong hana, ka shnong kaba la shu pynïap beiñ ïa u Aesop uba hok ba shi sur khlem daw khlem nongrim ka la khie khlam syndon kaba shyrkhei tang hadien katto katne snem ba ki la pynïap ïa u.
Ym lah ban ïa lehkai ïa ka pop ïa ka sang. Ym bit ban kheiñkai ïa ka tyrud ka smer ba ka mynsiem u nongïap mynsaw ïap tyrud ïap smer ka ju ud bad bud ryngkhi lem hadien jong ngi. Lada phim tieng ïa u briew, kata, kam leilei hynrei ngi dei pat ban tieng ïa u Blei.
