Nongpoh, Nailur 24 : Ka Tasku Ayush Health and Wellness Centre mynta ka sngi ka la rakhe ïa ka 10th Ayurveda Day ha Tasku Govt LP School halor ka phang Ayurveda for People and Planet kaba dei kawei na ki rukom sumar ba la kham rim kaba bun na ki briew ki dang shañiah khamtam ka jingsumar da ki dawai kynbat kiba duna ka jingktah ïa ka koit ka khiah
Ha katei ka jingrakhe la sakhi ruh da ka jingdonlang u Bah Sosthenes Sohtun MLA ka Jirang ba dei ruh u myntri ka tnad C&RD ka sorkar jylla kum u kongsan ha ka jingdonlang u Dr M Lamare Ayush Medical Officer ka Civil Hospital Nongpoh, ka Dr Vivid Rose Kharsyntiew, Bah B Lyngdoh 2nd OC ka Patharkhnah.
Haba kren ha katei ka sngi na ka liang u Bah Sosthenes Sohtun kum u kongsan u la ong ba u Myntri Rangbah ka Ri bad kumjuh ruh u Myntri Rangbah ka jylla ki ju don ka jingangnud ban thaw ki lad ki lynti ban pynbha ïa ki jaka sumar khamtam ka jingshimkhia jong u Myntri rangbah ka jylla na ka bynta ki paidbah nongshong shnong.
U la ong ruh ba ka Ayurveda ka dei ka rukom sumar kaba la don naduh hyndai hynthai bad watla ki rukom sumar ki la wan ha kiba bun rukom khamtam ka jingmih jong ki dawai phareng, kum ki briew ngi dei ban pynbiang ïalade ban sumar na ka bynta ban ioh ïa ka jingkoit jingkhiah bad u la ai ruh ka jingïaroh ïa ki dawai Ayurvedic kiba dei ki jait dawai kynbat ba la pyndonkam naduh mynshuwa bad kiba pynkoit ïa ki jait jingpang naduh tynrai.
