Shillong, K’ Lyngkot 29: Ka kynhun shipai Assam Rifle ha ka sngi Palei ka la pynlong ïa ka jingïakynduh lang jong ki shipai kiba la shongthait ha Gorkha Training Centre ha Happy Valley, Shillong bad ha kane ka sngi la pynbna paidbah ba la buh ïa ka jaka ba ki lah ban ujor ïa ki jingeh kaba ki ïakynduh na ka por sha ka por.
Haba ai jingkren ha kane ka jingïakynduh lang mynta ka sngi ka 29 tarik Kyllalyngkot u Lt. General Mohit Wadhwa SM ba dei u GOC ka 101 u la ong ba u ai khublei pdiang sngewbha ïa ki shipai kiba la shong thait bad kumjuh ruh ïa ki shipai kiba dang don ha ka jingshah hikai ha kane ka jaka.
U la ong ba ka jingkhublei ka leit sha kito ki shipai kiba la shongthait kiba la len lade bad dei na ka jingshakri jong ki ka la pynsah nam ïa ka kynhun shipai namar ba kila pyndep hok ïa la ka kamram kaba la bynshet ha ki bad haba ki leit ban trei kylleng kylleng wat hapdeng ki jingeh.
Shuh shuh na ka liang jong u, u la ong ba kum ka kynhun shipai dei ban peit ïa ka jingeh kaba ki la ïa kynduh da kine ki shipai kiba la shongthait bad kane ka jingpynlong ïa kum kane ka jingïalang ka long ban ai ka burom bad ban ïarap ïa ki kurim jong ki shipai kiba la khlad.
U la ong ruh ba lada don kano kano ka jingeh ka long ba ki kloi ban ïarap, la ka long ha ka kam ka jam, la dei ha kano kano ka jingeh kaba ki ïakynduh bad ki kam kiba ïa dei man ka sngi bad haba ïadei bad ki kam aiñ ruh ki kloi ban ïarap bad kane ka jingïalang ka long ban pynshai ïa kaei kaba ki lah ban leh na ka bynta ka bha ka miat jong ki.
