Ka Assam kan ïa pynbeit pud beit bad ki 4 jylla ban pynurlong ïa ka jingthrang u PM : Himanta

Shillong, Naitung 16 : Ka sorkar Assam ka la rai ban ïa pynbeit pud beit bad ki saw tylli ki jylla ba marjan jongka khnang ban pynurlong ïa ka jingthrang jong u Myntri Rangbah duh ka ri u Narendra Modi ban ïohi ïa ka jingïatylli kane ka thaiñ shatei lam mihngi ka ri India, ong u Myntri Rangbah ka Assam u Himanta Biswa Sarma mynta ka sngi.
Ka Assam ka don hapdeng ki jingïakajia khappud bad ki saw tylli ki jylla ba marjan jongka ka Meghalaya, Arunachal Pradesh, Mizoram bad Nagaland. “ Ngi la sdang ïa ka jingiapynbeit pud bad ar tylli ki jylla bad ngin pyndep lut ïa baroh saw tylli” ong u Sarma haba iakren bad ki lad pathai khubor mynta ka sngi ha nongbah Guwahati.
“Ka jingïasoi ïa ka Namsai Declaration bad ka Arunachal Pradesh ka long ka kam ban ïai sah kynmaw shirta namar ngi la pynduna ruh ïa ki shnong ba ïakajia na ka 123 tylli sha ka 86 tylli” ong u Himanta.
Ki arngut ki Myntri Rangbah kata jongka Assam bad jongka Arunachal Pradesh ki la ïakynduh ha Namsai, Arunachal Pradesh ha ka Sngi Thohdieng bad ïasoi ïa kane ka soskular ban ïa pynbeit ïa u pud u sam.
Kine ki ar jylla ki la kiew ïinglieh ïing saw bad ïa khun mukotduma la 15 snem ha ka ïing bishar Supreme Court halor u pud u sam. Haba ki ar myntri rangbah ki la shong bishar ki la lap ba 28 tylli ki shnong kim hap hapoh ka Assam naduh kaba sdang bad ki don kumba 15 haduh 20 kilometre shapoh u pud u sam ka Arunachal Pradesh.
Nalor kane ki don sa hynriew tylli ki shnong pat kiba ki bor sorkar jong ki ar jylla kim lap dien ïaki wat la ki don ha ka kyrteng Assamese bad ïakitei ruh ka Assam kan ym kam shuh, ong u Himanta.
Nalor kane ka Arunachal Pradesh ruh ki la lap ba ki don lai tylli ki shnong kiba ym hap hapoh ka Arunachal Pradesh kumta kin ym kam ïa ki bad na kane ka jingïapynbeit na ka 123 tylli ki shnong ba ïa kajia baroh shi katta mynta ki don sa tang 86 shnong namar la dep ïa pynbeit lypa mar kylliang da ki ar myntri rangbah jong ki ar jylla.
“ Ki Regional Committee kin sa leit jurip sha ki jaka khappud bad ngi kyrmen skhem ba sa kumba 20-25 tylli ki shnong ruh yn sa pynbeit lang shano ki hap. Ngin pyrshang ban pyndep ïa kane ka kam ha u Nailur 2022.
Ki ar tylli ki jylla ki la dep thaw ïa ki Regional Committee ban leit jurip sha ki bynta khappud bad ban pynkhreh ïa ka kaiphod kumba la leh bad ka jylla Meghalaya.
U Himanta u la ong ba ïa kane ka kam ïa pynbeit pud bad ki saw jylla u kwah ban pyndep hapoh ka jingrakhe dap 75 snem ka ri ne ka Azaadi ka Amrit Mahotsav bad ka thong ka long ban pynurlong ïa ka jingthrang u Myntri Rangbah bad u Myntri kam pohïing ka ri u Amitshah ban wanrah ka jingïatylli ha kane ka thaiñ.
U la ïathuh ba ka Assam bad ka Meghalaya ruh ki la ïasoi da ka soskular ban pynbeit ïa u pud ha u Lber mynta u snem bad ïa ka bynta ba nyngkong kata 6 tylli na ki 12 tylli ki jaka ba ïakajia la dep ïa pynbeit bad la ïasoi ïa ka soskular hakhmat u Myntri Kam Pohïing ka ri. “ Ngi kyrmen bad pyndep ïa kiba sah hynriew jaka kata Langpih, Block I bad Block II ha Karbi Anglong. Hooid kine kin long ki kam kiba eh bha bad ngin hap ban ïashong bishar bniah bha khnang ba ka kam kan ïaid beit” ong u Himanta.
Ha kaba ïadei bad ka Nagaland u la ong ba ïa kane ka kam yn ïa pynbeit ha ïing bishar Supreme Court bad tad haduh kata ka por la ïa mynjur ba baroh ar ki jylla kin leh ïaki kam pynroi ha khappud. Ki la ïarai ruh ban ym leh ïa kano kano kaba pynmong ne pynthut ïaka shongsuk shongsaiñ.
Ha kaba ïadei bad ka Mizoram ula ïathuh ba u myntri ba dei peit ïa ki kam khappud u Atul Bora un sa leit shen sha Mizoram bad “ Ngi kyrmen skhem ba ka jingïakren ïa pynbeit pud kan sdang noh” ong u Sarma.
Ka jingphiah ïa ka Assam bad pynmih ïa ki jylla Meghalaya Nagaland, Mizoram, Arunachal Pradesh ha ki snem 1970 ka la pynsahteng ban pynbeit pat ïa u pud u sam. ïa ki jaka la ïaknieh da ka Assam bad kine ki jylla ba dang thaw thymmai. Ka jingdon ki bynta khappud hapdeng ka Meghalaya bad ka Assam ki long 884.9 Km, 804.1 km bad ka Arunachal Pradesh, 512.1 km bad ka Nagaland bad 164.6 bad ka Mizoram.