Puk mih sa ka kam lehbeiñ bad ñiew beiñ kane ka sorkar MDA ba la lamkhmat da ka party NPP ïa ki shnong bad ki briew kiba shong sha ki thaiñ khappud. Ki nia kop jong u Chief Minister bad u Deputy Chief Minister ka jylla Meghalaya ba sngew kumba dei tang ma ki kiba lah ban pynbeit ïa u pud u sam bad ka Assam ka la pynjaw ummat snam pynban ïa ki shnong bad ki paidbah kiba shong sha ki thaiñ khappud.
Ka jingshah ñion beiñ jong ki shnong bad ki briew kiba shong sha ki thaiñ khapppud ka la long bad shaneng bad sharum (north and south) jong ka ri Khasi-Jaiñtia jongngi. Sha rum, kata sha ki thaiñ ri War baroh ki paidbah ki la ïa ud bad sngewsih kthang bha namar ki jaka puta jong ki kiba don sha lyndet ka Border Fencing bad ka ri Bangladesh (International Border) ki la shah knieh ei lut bun ki jaka rep, ki bri kwai- bri soh bad ki jaka kiba la long trai da ki para Khasi-Jaiñtia jong ngi. Ki shu jawdud ei ïa bun ki jaka ba ithiang kiba ju ïalehkai bad pynlong iew naduh ki por mynshwa katba mynta pat ki la don sha shiliang khappud ki nar shiah jong ka ri Bangladesh.
Ki ong hana,wat ki lum jingtep jong ki kmie ieid bad kpa ieid, meinah meisan jong ki ruh mynta ki don sha ka ri Bangladesh. Katba ki nang ud bad ujor sha ki bor Sorkar, katta ki nang shah ñ ion bad shah ban beiñ pynban haban da jem jai syndon. Ka pisa ka tyngka kam don jingmyntoi ne dondor ei ei haba la duhnoh ïa ka nongmei nongpa bad ka nongkynti lajong.
Haba phai pat shaphang shaneng (northern parts) jong ka ri Khasi-Jaiñtia, kane ka rukom ïa pynbeit pud thymmai ka Sorkar MDA kaba i kynrum kynram suda man ki jaka baroh shi lynter ki khappud bad ka Assam. Hynrei, u Chief Minister bad u Deputy Chief Minister ki dang ïaikop hi ba dei tang ma ki kiba stad tam ba ki lah ban pynbeit ïa ka jingïakajia khap pud (border disputes) mynta la 50 snem bym don ba lah pynbeit da mano mano ruh haduh ba ki la lah ban pynbiej bad khring ïa ki katto katne ngut ki MDC bad ki MLA sha ka Party jong ki hana, ba ka dei ka party kaba bhabriew tam kham palat ïa ka aktres ha ki phlim ruh. Phewse, na ki khubor ba la mih manla ka sngi, i kumba kam long satia kumta. Ka dei pynban tang ka jingshah shet ïa ka kam khappud.
Ka apot sepsngi ba kitei ki shnong ki la ïa kynduh kan long kaba sngewsangsot bad sngewsynei shisha shaba palat liam. Kito ki shnong bad ki jaka kiba hap sha ka jylla Assam kin shah pynïaid noh ha ki rul ki aiñ jong ka Assam. Kito ki shnong bad ki jaka Khasi-Jaiñtia kiba la pynhap sha Assam kim ïoh shuh ïa ka kyrdan Khasi ne riewlum kumba ki ïoh mynshwa ha ka Jylla riewlum Meghalaya jong ngi. Kumno kan jia ïa ki khun ki ksiew jong ki lada ka Sorkar Assam kam ithuh riewlum ne Schedule Tribe shuh ïa ki? Ka bri ne jaka jongki kaba leit sha Assam ruh kan long jaka Sorkar noh (public property) ym shuh kum ka bri ne jaka shimet (private property) ne ri Kur ne ri Raid ne ri Hima kumba long ha Meghalaya namar ka Assam ka dei ka ri-thor(plain areas) bad ka bud bad pyntreikam da ki rul ki aiñ ri Thor.
Lada kane ka jia shisha, kine ki nong soi MOU ki kylla long pynban ki nongshet kylla, ki nonglilam bad ki ingkhong shyllang mat pynban bad ha ka jaka ba kin ïohnam ïoh burom kumba ki khmihlynti, kin budnam ei pynban khamakha ha ka histori jong ka ri jong ngi.
Ki trai muluk trai jaka kin duh nong da ki lak ki klur ïa ki jaka bad shnong kiba hap sha Assam namar ha Meghalaya ki lah ban die duh ïa ki jaka jong ki katba ha Assam te, ki kylla ri Sorkar lut baroh. Mano ban ïakhun lem ban pynïoh biang ïa ka hok jong kiba la lilam bad die duh da kine ki briew kiba bat ïa ka bor ban leh kumta? Hato, dang don don mo ki Tirot Sing bad ki Kiang Nangbah kiba lah ban pha bad ïakhun lem na ka bynta ka ri bad ka jaitbynriew jong ngi ha kum kine ki por mynta? Kyndit bynriew noh! Ieng joit, ne jot syndon thiaw.
