Shillong, Jylliew 21 : U Chief Whip jongka Liang Pyrshah uba dei ruh u MLA jongka Umroi Constituency u bah George B Lyngdoh u la ong mynta ka Sngi Ba Ar ba ka All India Trinamool Congress (AITC) ka la nang khlaiñ bad nang suhthied ha ka jylla na kawei ka sngi sha kawei pat kum ka jingpynkhreh ïa ka Election MLA 2023.
U la ong “ Ka long kaba sngewtynnad namar tang hapoh kine ki khyndiat bnai ka AITC ka la ïoh ka jingkyrshan ba pura na ki paidbah naduh sor haduh nongkyndong. Ka long ka National Party kaba nyngkong eh ban suhthied kloi ha ka jylla. Ngi la seng nongrim neseng ïa ki Circle ha ki 50 tylli ki constituency, 24 ha ri lum Garo bad kiba sah ha Khasi bad Jaintia HIlls. Mynta ngin pyndep ïa kiba sah 10 tylli khnang ba ngin ïoh ban don ha baroh 60 tylli ki constituency” ong u bah George.
Kane ka jingkiew sted jongka AITC Ka pynpaw ba ki paidbah ki la kwah ban wanrah ka jingkylla ha ka synshar khadar hapoh ka jylla namar ki la ngiah ban ïohi ba la jur sa tang ki jingbamsap.Kumba ka AITC ka don ha ka Liang Pyrshah ki paidbah ki kwah ban wanrah noh da ka Liang Pyrshah ban ïalam ïaka jingsynshar haka jylla. Na kata ka daw ki paidbah naduh sor haduh nongkyndong ki ai ka jingkyrshan ba pura ïa ka TMC namar ki tip ba ka dei ka party kaban wanrah ki jingkylla bad ai ka jingshakri hok ïa ki paidbah, pynkut u bah George.
