Nongstoiñ, Rymphang 10: Ka jingkwah jong ka sorkar ban pyntreikam ïa ka Meghalaya State Investment Promotion And Facilitation Act 2024 (MSIPF), ka la pynlong ïa ki nongïalam jong ka Khasi Student Union sengkmie ba kan pyrshah jur bad ban pyntreikam ïa katei ka aiñ.
Kumta na ka bynta ban pynshai sha ki paitbah ka bri u Hynñiewtrep baroh kawei, ka seng kmie ka la phah da ki kot lyngkdop ha baroh ki district units, ba kin sam sha ki paitbah nongshong shnong na ka bynta ba kin pule bad ba kin sngewthuh shai, ba lada ka sorkar kan pyntreikam ïa katei ka aiñ, ka hok longtrai jong ki khun Khasi Pnar halor ka khyndew ka shyiap, ka riti ka dustur bad ki jingdon jingem kan duh shisyndon.
Na ka liang ki dkhot jong ka Khasi Student Union West Khasi Hills District unit, ha kine ki sngi ki la trei shtom met bad mynsiem ban sam ïa kitei ki kot lyngkdop ha baroh ki nongshong shnong, ba kin ïoh ban pule bad ba in sngewthuh ïa ki jingeh lada ka sorkar ka pyntrei kam ïa katei ka aiñ.
Ka KSU ha kitei ki kot lyngkdop ka la kdew shai ba lada ka sorkar kan pyntreikam ïa katei ka aiñ, ki don ki khyndai tylli ki mat kiba ktah haduh katta katta ïa ka hok longtrai jong ka jaitbynriew. Ka KSU ka la kdew shai ba katei ka aiñ ka dei ka aiñ iakjakor, kaba la pynkup bor tang ha ki katto katne ngut ki briew kiba don ha ka bor bad kiba riewspah.
Nalorkata ka seng ka la kdew shai ba ka rai jong ka sorkar jylla ban pynkylla kyrteng noh ïa ka Investment Meghalaya Agency sha ka Meghalaya Investment Promotion Authority, ka dei tang ka jingtap eit miaw namar ki kyndon aiñ ki dang sah hi kumjuh. Ka seng ka la pynshai ruh ba wat haba la weng ïa ka kydon 34 na katei ka aiñ, hynrei ka jingpynkup bor ïa ki District Council, kam pat long kaba paka bad kaba pynsngew thikna ïa ki trai mukuk ba ki jaka ki puta bad ki khyndew ki shyiap jong ki, kin lait na ka jingshah dakhol ha kiwei pat ki jaitbynriew ne ka sorkar jylla.
Ka seng ka la kdew ruh ba na ka por sha ka por ka la pynsngew sha ka sorkar, ba ka dei ban buh kyndon ïa ki Kompeni kiba wan seng kam ha ka jylla ba ki dei ban ai kam aijam ïa ki samla kiba la biang ka kyrdan. Namar ba tang ha ki kam sorkar yn ym lah ban ïoh lut, hynrei haduh mynta ka sorkar kam shym pat la lah ban pynurlong kumba la buh, namar ba ki kyndon jong ka MSIPF ki long pyrshah bad ki long pynban ki kyndon kiba ïada ïa ki bar jylla bad kiba ailad ba kin wan rung katba mon shapoh ka jylla.
Ki khyndai tylli ki mat ba kongsan ba ka seng ka la dew lyngba kitei ki kot lyngkdop ki long, ba ka seng ka la peit nyngkong eh ïa ki ktien lamphrang jong kitei ki aiñ kiba ai bor ïa ka sorkar, ban ailad ïa ki Kompeni ba na shabar ba kin wan seng karkhana ha ka jylla, da kaba pynsynjor ïa ki kyndon kiba ïadei bad ki hok jong ki nongtrei, ki aiñ ïada mariang ki ban wanrah pat ïa ka jingjulor ïa ka mei mariang, ki mar kiba don halor ka khyndew, ka jinglah ban leh shilliang ha ka ban jied ïa ki kynhun seng karkhana ka plie lad pat ïa ki kynhun snaïap ban treikam ha ka jylla, ki ban plie lad ruh ha ka ban pynïaid ïa ka pisa ba la shu kamai beaiñ ban lait na ka jingsiew khajna.
Ka seng ka la kdew ruh ba ha ka kyndon kaba 39 yn ym don mano mano ba lah ban ujor sha ki bor ka aiñ ne wat shaduh ka ïingbishar ïa ki dkhot ka Governing Council, High Power Committee, State Investment Committee, District Investment Committee bad Nodal Agency lada ki leh kano kano kaba bakla lada ma ki, ki sngew dei ban leh.
Kumta ka seng ka dawa ïa ka sorkar ba ka dei ban weng noh shisyndon ïa katei ka kyndon, khnang ba kan ym don kano kano ka jingpyndonkam bakla bad ka jingshah ïuhroit jong ki paitbah hynrei baroh kin ïalong mar ryngkat kat kum ka riti synshar paitbah.
Ka jing pynsynjor jong ka sorkar ïa ka kydon 36 jong a MSIPF ka ïalam bakla haduh katta katta, namar ka ai bor ïa ka sorkar ban pybor bad pynïaid ïa ki katto katne ki kynhun ne ki riew shimet, khlem da kheiñ ïa ka jingshah ktah jong ki paitbah. Ka kyndonkaba 33 pat ka pynsynjor ïa ka aiñ da kaba kdew ba yn ym lah an pynshitom ïa ki riew shimet ne ki Kompeni, lada ki leh kano kano ka kam beaiñ lada ki sakhi satr kim biang.
Ki don shibun kiwei pat ki kyndon kiba kynthup ha ka MSIPF kiba ka seng ka pyrshah jur bad ka dawa ba ka sorkar ka dei ban weng noh shisyndon. Kumta lyngba kitei ki kot lyngkdop, ka seng ka kyntu ïa ki paitbah ba kin peitngor bad ki ai ka jingkyrshan ba pura ïa ka seng haba ka ïeng ban ïaleh na ka bynta ka jingmyntoi jong u paitbah ka bri u Hynñiewtrep.
