Ka aiñ kan leh ïa kaba donkam, ong u LO ba paw kyrteng u MLA ha ka tohkit bamsap Lokayukta

Shillong, Nailar 06 : U Nongïalam ka Liang Pyrshah ha ka Iing Dorbar Thawaiñ ka Jylla, Bah Ronnie V Lyngdoh u la ong ba ka aiñ kan sa leh ïa kaba donkam halor ka jinglap jong ka Meghalaya Lokayukta ïa uwei u MLA ba u suba donkti ha ki kam bamsap.
Lah ban kdew hangne, ba u Sangjay Sangma, MLA ka NPP na Mahendraganj u la dei uwei na ki 12 ngut kiba paw kyrteng ha katei ka jingkynnoh bamsap kaba la lap da ka Meghalaya Lokayukta
“Dei ban kynmaw ba kane kadei ha shwa ba (Sanjay) un shah jied kum u MLA. Nga ngeit ba kata ka la paw ba u dei u kontraktor. U dei u MLA mynta kumta ka dei ha ka kti jong ka aiñ ban leh ïa kaba donkam,” la ong u Bah Ronnie haba kren bad ki lad pathai khubor.
Halor ka jingkylli, la ka Liang Pyrshah kan rah ïa kane ka mat bad u Lamphang ka Iing Dorbar Thawaiñ ka Jylla, na ka liang u nongïalam ka CLP u la ong ba katei ka shong ha ki bor jong ka ain ban leh ïa ka kam namar kam dei satia ka kam jong ka Liang Pyrshah. “Kadei ïa ka Lokayukta bad kadei ka kamram jong ki bor ka aiñ ban leit mih ha u Lamphang ïa kaei kaba dei ban leh bad ma u pat un sa leh ïa kaba donkam,” u la bynrap biang.
Shuh shuh u ong ruh ba ka Iing Bishar ka don, kumta hap ruh ban bud ïa ki kyndon jong ka ain. “Katba ym pat rai pynrem, uba shah kynnoh u dang dei uba lui lui. Lada la pynngat kyndon, kumta ki kyndon aiñ kumba nga ong, ngi sngewkmen bad ngi sngew sarong ba ka ain ha India ka dang long salonsar ha kaba ki paidbah ki lah ban phaikhmat sha ka Iing Bishar ban ïoh ïa ka jingbishar ba hok,” la bynrap biang utei u nongmihkhmat na Mylliem Constituency.
Kiwei pat kiba paw kyrteng lang ha ka Meghalaya Lokayukta ki kynthup ïa ki khyndai ngut ki dkhot barim jong ka Executive Committee bad secretary jong ka Garo Hills Autonomous District Council (GHADC) nalor ki arngut ki kontraktor kiba khlem pyndep pura ïa ka jingtei ïa ka hostel jong ka Council ha Tura kaba la poi sha ka Rs. 6,01,31,100.00.