Nongstoiñ, Rymphang 08: U Superintendent of Police West Khasi Hills District Bah Herbert P.Kharkongor (MPS), ha ka kyrwoh khubor kaba u la pyllait, u la maham tyngeh ba ka aiñ kan ym don jingmap satia ïano ïano ruh kiba pyrshang ban pynthut ïa ka suk ka saiñ ha ka imlang sahlang jong ka District baroh kawei.
Kane ka jingpynmih khubor na ka liang u Superintendent of Police jong ka District, ka la long hadien katto katne sngi jong ka jingmih ka dur khih ha ki rynsan social media, ba la ïohi ïa ka kynhun ki khynnah runar kiba ïa shoh ïa dat hapdeng surok jong ka Nonbah kaba don ha shnong New Nongstoiñ, kaba la jia ha ka shiteng synñia jong ka 24 tarik Kyllalyngkot 2026.
Ha kaba ïa dei bad katei ka jingjia ïa shoh ïa dat jong ki khynnah runar, na ka liang u SP u la pyntip ba ka tnad pulit jong ka West Khasi Hills, ka la dep shim kam bad ka la dep ban register Suo Moto Case ha Nongstoiñ Sardar Police Station, ha kaba ka jingtohkit ka dang ïaid shakhmat.
U SP u la ïathuh ruh ba ïa baroh kitei ki runar kiba donkti ïashoh ïa dat lem bad u ba la mynsaw eh na katei ka jingjia, la dep ban ithuh bad la leh ïa kaba donkam katkum ki kyndon ba shong ka aiñ.
“Nangne shakhmat, lada don kino kino ki briew ne kynhun kiba pyrshang thaw klumar ha kano kano ka jaka, dei ban ai jingtip noh mar mar sha ki pulit lyngba ka Police Control Room (PCR) Number 9366498499 bad Helpline No. 112. Nalor nangta, ki paidbah nongshong shnong ki lah ban leit ai jingtip mar mar sha ki Police Station bad ki Out Post kiba jan tam”, ong u SP.
“Na ka liang ka District Police ka long kaba la kloi ban shimkhia bad ban leh ïa kaba donkam pyrshah ïa kino kino kiba wanrah ïa ki jingïa hylla pyrta, thaw jingklumar kaba wanrah ïa ka thut jong ka shongsuk shongsaiñ hapoh ka District. Ka aiñ ka don ban leh ïa kaba tyngeh ïa kino kino ki briew kiba wanrah jingklumar bad pynthut ïa ka jingshong suk”, ong u Superintendent of Police Bah Herbert P.Kharkongor.
