New Delhi, Naiwieng 16: Ki lad pathai khubor kidei ka khmat bad ki shkor na ka bynta ki nongshong shnong jong ka ri synshar paidbah. Katba ngi dang rakhe ïa ka National Press Day, hapdeng ka jingkiew jong ki jingtip ba ïalam bakla ha ka juk jong ka AI, ka jingïada ïa ka jingshaniah ha ki lad pathai khubor ka long kaba kongsan bha na ka bynta ban pynkupbor ïa ki nongshong shnong. Kane ka jingsngew ka la mih na ki nongïashim bynta kum ka jingsngewkhia ha ka jingïalang kaba la pynlong ha National Media Centre ha New Delhi mynta ka sngi. Ha kaba ïadei bad ka phang pdeng mynta u snem- “Ka jingïada ïa ka jingshaniah ha ki kot khubor hapdeng ka jingkiew ki jingtip ba ïalam bakla”, ka Chairperson jong ka PCI ka Justice (Rt.) Ranjana Prakash Desai ka la ong, “Ka AI kam lah satia ban wan bujli ïa ka jingmut jingpyrkhat jong u briew”. Ka jingbishar, ka jingsngewthuh bad ka jingsngew kitkhlieh kaba ïalam ïa uwei pa uwei u nongthoh khubor ka dei ban khanglad ïa ka jingsaphriang jong ki jingtip kiba ïalam bakla.
Ha ka jingai jingkren jong u, u CEO ka PTI u Vijay Joshi u ai jingmut kumno ban pynbeit ïa ka ‘infodemic’, kaba baroh ngi ïakynduh mynta kum ka imlang sahlang. U la ong, “Ai ba ka jinglong thikna kan kham kongsan ban ïa ka jingsted ha ki lad pathai khubor bad ki digital media kiba pynïaid da ki AI algorithm”. Ha kane ka jingïalang la wan ïashim bynta da u Myntri ka Tnad Information & Broadcasting, ka Tnad rel, bad ka Tnad Electronics & Information Technology, u Ashwini Vaishnaw. U Myntri Khynnah ka sorkar pdeng ba dei peit ïa ka Tnad Information & broadcasting bad ka Parliamentary Affairs u Dr. L. Murugan, Secretary ka Tnad Information & Broadcasting, Sanjay Jaju bad ka Secretary ka PCI, Shubha Gupta ki la ïadonlang ha kane ka sngi.
Kyntu ka PCI ban don ka jingbahkhlieh ha ka kam pathai khubor
Ka Justice Ranjana Prakash Desai ka la kren shaphang ki ar tylli ki jingkitkhlieh jong ka PCI ban ïada ïa ka jinglaitluid jong ki nongthoh khubor bad ban pynneh ïa ki kyrdan ba ha khlieh duh jong ka jingbeit ka kam thoh khubor. Ka la ong ba ka kam thoh khubor ka donkam ïa ka jinglong hok, ka jinglong kaba thikna, bad ka jingaiti ban ïasam ïa ki jingtip kiba dei, khamtam mynta haba ki jingtip kiba ïalam bakla bad ka jingpyndonkam bakla ïa ka teknoloji ki nang kiew.
Ka la ong ba ka PCI ka la thaw ïa ki komiti bad ki kynhun wad bniah ïa ki jingshisha bad ka la pynkynmaw ïa ki nongthoh khubor ban trei da ka jingkitkhlieh bad ban pynshisha ïa kawei pa kawei ka jingjia. Ka la ban jur ruh ïa ka jingdonkam jong ka jingïada ha kaba ïadei bad ka pisa na ka bynta ki nongthoh khubor lyngba ki skhim jingïarap bad ka insurance, bad ka la ong ba ki prokram ai jinghikai jong ka PCI ki ïarap ïa ki nongthoh khubor samla ban nang ïa ki rukom treikam kiba don jingbahkhlieh.
Ka la bynrap ba watla ka AI ka lah ban long kaba myntoi, hynrei ka PCI ka dang peitngor ban ïada na ka jingpyndonkam bakla ïa ka. Ka la ban jur ba wat la kine ki tiar ki lah ban long kiba la nang la stad katno katno ruh, kim lah satia ban wan bujli ha ka jaka jong ka jingmut jingpyrkhat jong u briew- ka jingbishar bad ka jingdon jingbahkhlieh.
Ka jingbatai ka jingshaniah ha ka juk AI
U Vijay Joshi, CEO ka PTI u la ong ba ki kot khubor ki dei ban bat ïa ka jingbahkhlieh kaba khlaiñ kum ki nongpynthikna ïa ka jingbahkhlieh ha ka synshar paidbah. U la maham ba ki khubor ba ai jingsiew, ki jingpynbna bad ki khubor pynshongshit ki la ktah ïa ka jingshaniah jong ki paidbah. Ka jingpynthut ki kam digital mynta ka kheiñkor eh ïa ka jingïadei ban ïa ka jinglong thikna, kaba pynmih ïa ki jingtip kiba noh shiliang bad kiba set ïa ka jingshisha. Ka khlam ka la pyni haduh katno ka jingshisha bad ki jingtip kiba ïalam bakla ki lah ban ïakhlehlang, ka jingma kaba la pynsniew shuh shuh da ka AI mynta.
U la pynpaw ruh ba ki nongthoh khubor ki dei ban shim ïa ka jingkitkhliehlang ban pynthikna ïa ka jingshisha kaba lah ban pynshisha. U la pynpaw ïa ka kam jong ka PTI na ka bynta ka jingshisha, ka jinglong thikna, ka jinglong hok bad ka jinglaitluid naduh ba la seng ïa ka da ki 99 tylli ki kot khubor. U la ban jur ba ka jinglong thikna ka dei ban long beit kaba kham kongsan ban ïa ka jingsted bad ba ki khubor ki dei ban long kiba lait na kano kano ka jingthmu.
Ki sienjam kum ka Fact Check ki ïarap ban ïaleh pyrshah ïa ka jingsaphriang jong ki jingtip kiba ïalam bakla da ki lad pynshisha kiba bun. U la ong ba khnang ban ïada ïa ka jingshaniah ka long kaba donkam ban hikai ïa ki nongthoh khubor shaphang ka jingbahkhlieh bad ka jingpyrkhat kaba jylliew. U Joshi u la pynkynmaw ba ka jinglaitluid jong ki nongthoh khubor kam dei ka hok ban pynsniew ïa ki lad ai jingtip bad ba ka kam thoh khubor ka dei ka jingshakri paidbah kaba la tei halor ka jingshaniah.
Shaphang ka Press Council of India
Ïa ka Press Council of India la seng da ka Act of Parliament kum ka bor quasi-judicial ha u 1966 (ba la pynskhem biang ha u 1979), da ka jingthmu ban don ïa ka rukom pynïaid dalade hapoh jong ka kot khubor ban pynthikna ïa ka jingai khubor kaba laitluid bad kaba don jingkitkhlieh. Naduh kata ka por, ka Press Council ka ïaleh beit ban ïada bad pynneh ïa ka jinglaitluid jong ki kot khubor bad ban kyntiew ïa ka kyrdan jong ki kot khubor bad ki tnat pathai khubor ha ka ri, bad ka la don ruh ïa ka bynta kaba khraw kum ka kynhun ai jingmut ïa ki Ïing dorbar thaw aiñ bad kiwei kiwei ki bor synshar.
