Shillong, Jylliew 26 : U Lat ka jylla u Satya Pal Malik u la ong ba ka Agnipath scheme kadei ka lawei ba dum ïa ki shipai bad ong ruh ba kane kan ktah bha ïa kito ki shipai kiba shongthait khlem ka penshon hadien ba ki la dep shakri na ka bynta saw snem.
Une u Lat u ba la bat ruh kum u Lat ka Jammu bad Kashmir u la kyntu ïa ka sorkar pdeng ba ka dei ban bishar bniah ïa katei ka skim thymmai kaba ki samla kin shah jied kum ki shipai ba shipor.
Kumba 75 persen na kitei kiba pynrung kam kin hap ban shongthait bad yn khot ïa ki ki Agniveers bad hadien saw snem ka jingshakri pat kin ïoh ïa ka penshon bad ruh ka health insurance. Kine ki shipai ba thymmai kin hap ban kilan met naka bynta hynriew bnai bad hadien kata pat kin ïoh shuti na ka bynta hynriew bnai.Hadien lai snem ba ki trei kin hap ban leit phai sha ki ïing ki sem bad kumta kan eh bha ïa ki ban ïoh shongkurim,” ong u Malik haba kren bad ki lad pathai khubor.
Shuh shuh u ong ruh ba ka Agnipath Scheme kadei ka lawei ba dum ïa ki shipai ka ban knieh noh ïa ka jingkyrmen jong ki ruh.
U Malik u la ong ruh ba dang shen u la kren wat ïa ka ishu jong ki nongrep kiba ïakhih pyrshah ïa ka aiñ nongrep kaba la weng noh bad mynta pat ula kren na ka bynta ka ishu ki samla bad ka jingeh ba ki kynduh.
Haba jubab halor ka jingkylli kaba ïadei bad ka jingthmu ban shongthait noh, u Lat u la ong ba um don jingmut satia ban rung sha ka saiñpyrthei lane ban ïakhun elekshon. “Ngan ïakhun na ka bynta ka ishu ki nongrep bad ki shpai haba ki donkam,” u la bynrap biang bad ngan thoh kot ruh halor ki bynta khappud ka J & K
