Shillong, Jylliew 24: Ka Meghalaya Pradesh Youth Congress (MPYC) ka la ong ba ka Agneepath Scheme ba la wanrah da ka sorkar NDA na ka bynta ka jingpyn rungkam shipai ka long pynban kum u shiah uba dung bad thar ïa ki Samla kiba kwah ban shakri ïa ka ri kum ki Shipai.
Ha ka kyrwoh ba la phah da u Vice President ka MPYC, u Bah Banphiralang Basaïawmoit, u la ong ba ki Samla ka jylla Meghalaya ruh ki la ngat ha kane ka apot jong ka Scheme, ha kaba da ki spah ngut ki la duh ban ïaleh ïa ka eksam kaba ki la pynkhreh bha bad pyndep ruh ïa kiwei ki test naduh une u snem baladep.
Da kaba beiñ ba kane ka skhim ka long kum ka jingteh syngit na ryndang jong ki Samla, ka MPYC, ka ong ba ïa kane ka skhim la wanrah ha ka rukom kaba kulmar da ka jingthmu ban weng ïa ka jingkyrduh kam kyrduh jam kaba shipor, pynban ka long ka jingtim ïa kiba bun ki Samla kiba ladep banïaleh ïa ki eksam rung kam shipai.
Shuh shuh ka MYPC, ka ong ba ka jingaikam kaba tang saw snem ka wanrah bun ki jingkylli, namar hadien saw snem, kaei pat kaba kito kiba la rung ha kane ka kam shipai saw snem kin leh hadien ba ki la kut noh kane ka jingtrei kam shipai jong ki. Ka sorkar ka ong ba kan ai ïa ki da kiwei pat ki kam. “Ngi kwah ban kylli ki kam kiba kumno kin ai?. Ha kano ka rukom yn jied ïa ki?”, la ong u nongialam ki Samla Congress ha ka jylla.
Da kaba ïasnohkti lang bad ka Indian Youth Congress ban pynrem jur ïa kane ka skhim pynrung kam shipai, ka MPYC ka ong ba kane kadei kawei pat ka rukom treikam jong ka sorkar India ban pynhun bad pynbiang ïa ki heh spah, namar da kaba khñiot beiñ ïa kiba rit baria, kan pynmyntoi ïa ki heh spah ki ban kin khñiot beiñ ïa ki samla ha ka thungkam thungjam.
Ka Congress ka buh ka jingkylli ruh ïa ka sorkar ba kumno ka nud ban wanrah ïa ka rukom pynrung kam shipai kaba kum kane, ha ka por ba ka ri ka mad ïa ki jingma na shiliang khappud ha baroh ar jaka, kata ha LOC bad ha LAC.
