Ka Act East Bussiness Show kan ïarap ban kyntiew ïa ki kam khaiï ka thaiñ shatei lam mihngi, ong u Conrad
Shillong, Lber 25: U Myntri Rangbah ka jylla u Conrad K. Sangma u la plie ia ka 7th Act East Business Show ha State Convention Centre, Shillong, ha kaba kane kan ïarap ban kyntiew ïa ki kam khaiï bad ki jingpynlut hapdeng ki jylla kane ka thaiñ shatei lammihngi bad ka BBIN bad ki ri ASEAN. Ha kane ka prokram kaba lai sngi yn ïa shim bynta da ki ambassador bad ki nongmihkhmat na ki ri bapher bapher ki ban kyntiew ïa ka jylla Meghalaya ha kaba ïadei bad ka ïoh ka kot, ki kam technology, ka rep ka riang bad ki kam jngohkai.
Haba kren ha kane ka sngi u Myntri Rangbah u la banjur halor ki kam khaiï ha kane ka thaiñ bad khamtam kiba donkam na ka bynta ka jylla Meghalaya. U la ong, “Kaei kaba donkam na ka bynta jong ngi ka long ban ïoh ka jingïatreilang ha baroh ki liang. Kum kine ki prokram kin wan bad kin leit hynrei ka jingïalong paralok bad ka jingïateh kan kiew lyngba kine ki prokram kiba kum kine.”
U la banjur ïa ka jingdonkam ban don ka jingmon kaba khlaiñ ha kaba ïadei bad ki kam saiñ pyrthei kiba lah ban pynïaid shakhmat ïa ki kam ki jam, “Ngi donkam ban phoh sniew ïa kaba heh. Ngi la buh ïa ki nongrim na ka bynta ban kyntiew ïa ka pule puthi bad kiwei pat ki lad jingtei kiba long naduh tynrai,” u la ong.
U Myntri Rangbah u la banjur ruh halor ka jingdonkam ban pynleit jingmut halor ki Self Help Group bad ki cooperative society jong ka jylla, ki ban rah ïa ka roi ka san ha kane ka jylla.
La ïoh ruh ka jingkren lamphang na u Bah Sniawbhalang Dhar, Symbud Myntri Rangbah ka jylla u ba khmih ïa ka tnat Commerce and Industries, Govt. of Meghalaya bad u Bah Donald Phillips Wahlang, Chief Secretary, ka sorkar jylla, la ïoh ruh ka jingpyni ïa ka
Investment Destination da u Dr. Vijay Kumar D, IAS, Commissioner & Secretary, Planning Department, Govt. of Meghalaya.
La ïoh ruh ka jingkren na u Mahesh Kumar Saharia, Chairman- NER, Indian Chamber of Commerce & Honourary Consul of Indonesia to Kolkata, India.
Kiba la shim bynta ha kane ka prokram ki long His Excellency u Mahesh Kumar Saharia, Chairman – NER, Indian Chamber of Commerce bad Honourary Consul of Indonesia to Kolkata, India; ka Nivruti Rai, MD & CEO of Invest India, bad ki ambassador ki nongmihkhmat na ri Germany, Thailand, UAE, Indonesia, Australia, Bangladesh, Malaysia, Bhutan, Nepal, bad Philippines bad kiwei kiwei.