Ka 12 Rymphang ka dei ka sngi ba shah lehbeiñ u para nongñiah kali, ngi kwah ban ithuh kum ka Driver’s Day

Nongpoh, Rymphang 12: Ka Joint Action Committee of All Ri-Bhoi Passenger Vehicle’s mynta ka sngi kala rakhe ïaka 9th Meghalaya Driver Day Celebration ha Parish Hall Nongpoh kum ka jingai nam ïaki nongñiah kali kamai kiba la shakri met bad mynsiem ban pynbiang ïaka jingdonkam bad ka leit ka wan ki paidbah.
Ha kane ka sngi u Bah Mayral Born Syiem MLA ka Nongpoh u la leit ban shim bynta kum u kongsan haka jingdonlang u Bah I Kharmon DTO ka Ri-Bhoi kum u symbud kongsan, u Rubul Ali Officer Incharge ka Nongpoh Traffic Branch, ka kong Fenelia Lyngdoh Nonglait Legal Adviser ka JAC, u Bah Wandonbok Jyrwa Chairman JAC ka All Meghalaya Passenger Vehicle’s, u Bah Disparsing Rani uwei naki nongwad RTI ka jylla, u Bah Ferdinald Kharkamni President ka KSU North Khasi Hills District, ki nongïalam ka ARBPV bad kiwei kiwei ki riew rangbah.
Naka liang u Bah Wandonbok Jyrwa kum u Chairman JAC ka AMPV u la ong ba kum ka kynhun ki nongñiah kali kamai kila jied ïaka 12 tarik man u snem ban rakhe ïaka Driver’s Day namar ka dei ka sngi sah jingkynmaw jong ka jingshah lehbeiñ ki nongñiah kali kamai lyngba ka jingjia ha 3 mer ha kaba uwei u nongñiah kali kamai na nongkyndong u la shah synrut haka kali jong u Dr Mukul Sangma bad kaba sngewsih ka long ba u la shah pynngat kyndon ba thmu pyniap briew kabala pynsuhjer ïa kiba bun ki para nongñiah kali ki bym kheiñ snep shuh ïaki rit ki ria namar kum ki nongñiah kali kamai kim don kano kano kajingthmu pyniap briew hynrei hapdeng ka jingïakhun utei u rangbah u la lait noh.
Halor kane ka jingjia kum ki nongñiah kali kamai naduh kikali rit haduh ki kali heh ki dap da ka jingsngewkhia kaba jur bad donkam ka jingïatehsong ban ïatylli naka bynta ka jingeh ba mad da ki para nongñiah kali bad kum ka kynhun kila rakhe ïa kane ka sngi ki nongñiah kali la kumba 9 snem mynta bad ki kwah ba ka sorkar kan ithuh noh ïaka kum ka Driver’s Day haka jylla Meghalaya.
U Bah Mayral Born Syiem haba kren ha kane ka sngi kum u kongsan u la pynpaw ka jingsngewkmen ban don bynta lang ha kane ka sngi bad ki nongñiah kali, ryngkat ka jingkyntu ïaki nongñiah kali kamai ba kin burom bad ïeid ïaka kam kaba ki trei namar kadei ka kam kaba pynim jakpoh ïaki kaba ki lah ban pyndap pat ïaka iing ka sem.