Jynrat ka erïong ar tylli ki ïing ha Bataw, mana ka DS Bataw ban tur shajan ka Leshkha Power House

Khliehriat, Jymmang 31 : Hynnin ka sngi, ka 30 tarik jymmang, ka lyer kaba jur ka la pynjor ïa ki ar tylli ki ïing ha shnong Bataw, East Jaiñtia Hills District ha kaba ka lyer ka la rat ïa ki tin sop ïing haduh ba ki dkhot jong ki longïing kim long shuh ban shong ban sah hapoh ïing bad ki hap ban shu sah bad ki para marjan.
Na ka liang u Waheh Shnong Bataw, u bah Deihok Sumer, u la iathuh shuh shuh ba ki longïing kiba la shah ktah ha ka lyer ki dei ka ïing jong ka kong Phur Sumer bad ka ïing jong i kong Meriki Lyngdoh kiba don san ngut ki dkhot kiba sah ha kane ka long ïing.
Na ka liang ki nongpynïaid shnong ba kynthup u Secretary Shnong Bataw, u bah Nehlang Suchiang, u Assistant Secretary, u bah Macdonald Suchiang lem bad ki Dkhot ka Executive Body jong ka shnong, ki la leit peit leit jurip ia kitei ki longiing ba shah pynjulor ha ki bor mariang bad lap ba ka jingjulor ka la jur haduh ba kim long shuh ban shong ban sah hapoh ïing bad halor kane ka jingjia u Waheh Shnong lyngba u Gramsevak jong ka Bataw Circle u la pyntip sha u BDO jong ka Wapung C&RD Block ban iarap lem ban pynioh ïa ki lad jingiarap ïa kitei ki longïing ba shah ktah.
Namar ka jingther jur u slap bad ka jing jur ka lyer kaba dang bteng haduh mynta, na ka liang u Waheh Shnong, u bah Deihok Sumer u buh ruh ka jingkyntu ïa ki paidbah nongshong shnong ba ki dei ban long husiar bad ruh ban kiar na kaba leit trei sha ki bri, kumjuh ruh sha ki jaka kiba don ha rud ki wah khamtam eh ban kiar ban leit sha ki jaka ba jan bad ka power house Leskha namar kan dang don ka jingpyllait um na ka dam jong ka Leshkha ba la pyntip da ka ophis u Executive Engineer, Myntdu Leskha Civil Division,MePGCL.