Jynjar ki nongshong shnong jong ka shnong Mawpud ba sniew shaba palat ka surok

Mawkyrwat, ‘Nailar 02: Ka long kaei kaei kaba i sangsot haduh katta katta na ka bynta kiba paidbah nongshong shnong jong ka Mawpud namar tang na ka daw jong ka jingpyntrei torti u kontraktor ïa ka surok ha kaba tang ar snem ba la dep siang rong ka surok mynta ka lajot lathai.
Namarkata, halor ka jingsniew palat ka surok ban leit sha shnong Mawpud na ka liang ka HITO jong ka Ranikor Circle hadien ka jingud jingnam jong ki paidbah ki la hiar jurip bad ha kaba da la ki jong ki khmat ki la lap ïa ka jingshisha ba ka la sinew. Kumta ka HITO ka kyntu namarkata, ïa ka tnad PWD (Roads) ban siang pynbha biang ïa kane ka surok khnang ba kan nym buh jingeh ïa ki paidbah ha ka ïaid ka ïeng khamtam ha ka pang ka shitom.
Ym tang kata, ka seng ka kyntu ïa ka ophis treikam ba ka dei ban tuklar ïa ki kontraktor ba haba ki shim ïa ka kam ki dei ban da trei bha ïa ka khamtam ïa ki surok bad ba kim dei ban shu trei tang dep rulom tang ban ïoh-nong ha ka pla la-jong khlem pyrkhat pat ïa ka surok ba kan neh katno por.
Halor ka jingtrei-torti jong ki kontraktor, na ka liang ka HITO jong ka Ranikor Circle ka sngewban pynrem jur bad kyntu ïa ka PWD (Roads) ba kan nym ai kam shuh ïa kum kine ki kontraktor kiba pyrkhat tang ïa ka pla la-jong khlem pyrkhat ïa ki paidbah kiba jynjar haba ki iaid na ki surok.
Kane ka long ka kyrwoh khubor ba la phah da u bah Arthur Thongni, Secretary jong ka HITO Ranikor Circle.