Nongstoiñ, Naiwieng, 27: Ka surok na Nongstoiñ shaduh Sohpian kaba jngai tang kumba hynñiew kilomitar, ha kine ki sngi ka sah satang u budlum bad ym idei shuh ba ka dei ka surok kaba ki kali ba kit ïa ki nongleit nongwan ki dang dei ban ïaid, namar tang ban ïa kiar para kali rit ym don jaka shuh namar baroh arliang ka surok ki la long kum ka kharai.
Namar ba katei ka surok kaba la don satang u budlum, dang ha ka taïew ba la dep ka jingïatyngkhuh kali ka la jia ha katei ka surok ha kaba kawei ka longkmie bad uwei u khynnah ki la shitom jur.
Katkum ka jingtip ba la ïoh dier por, la ong ba katei ka jingïatyngkhuh kali ka dei namar ba ka surok ka la khim palat, ha kaba bad ha katei ka por ki don ki briew kiba ïaid ha surok bad ha ka por ba u nongniah u dang ïaleh ban kiar ïa kitei ki briew, kawei pat kali kaba wan na shakhmat ruh ka la mut ban kiar na kajuh ka phang ha kaba ki la ïa tyngkhuh.
Halor ka jingsniew palat jong katei ka surok, na ka liang ki nongñiah kali bad ki paitbah ki la dawa na ka sorkar ba ka dei ban phah pyndap khyndew ha baroh arliang jong katei ka surok, khnang ba ki kali kin ïoh jaka ban kiar para kali.
Ha kaba ïadei bad katei ka surok, dang ha u bnai Risaw ba la dep u bah Prestone Tynsong Symbud Myntri Rangbah ka jylla, u ba peit ruh ïa ka tnad PWD, ha ka jingwan jong u ha Nongstoiñ u la kular ba ka sorkar kan sa mang pisa haduh 22 klur tyngka ban shna bad pynheh ïa katei ka surok.
Hynrei na ka liang ki nongñiah kali bad ki paitbah haba ïakren bad u nongthoh khubor, ki la ong ba kat haduh ba ka sorkar kan da pynbit pynbiang ïa ki jingdon kam shuwa ban khot tender na ka bynta ban shna ïa katei ka surok, ka lah ban jia wat ka jingïatyngkhih kali haduh ban da duh ei wat ki mynsiem briew ruh.
Kumta na ka bynta ba ki nongñiah kali bad ki paitbah nongleit nongwan kin lait na ki jingmynsaw, ka sorkar ka la dei ban phah pyndap khyndew shuwa ha baroh arliang jong ka surok. Lane lada kam lah ban leh kumta ka la dei ban bthah ïa ki bor pynïaid district jong ka West Khasi Hills, ba kin pynmih da ka hukum ba dei ban shah tang ïa ki kali kiba kiew na Nongstoiñ.
Katba kiba hiar sha Nongstoiñ pat ki dei ban hiar lyngba ka National Highway sha Mawrusyiar shaduh Nongstoiñ. Nalor kata ki la ong ruh ba dei ba buh da u pulit pynïaid kali ha Sohpian lane buh da ki jingpyni dak kum ka No Entry khnang ba baroh ki nongñiah kali kin tip.
