Jyllei u drok ha ki thaiñ Nongthymmai, Nongrah bad ki shnong ba markhap

Shillong, Jylliew, 11: Ka Khasi Students Union (KSU) Nongthymmai Circle ka la pynpaw ïa ka jingsngew bynñiaw halor ka jingjyllei jong u drok ha ki thaiñ Nongthymmai Pyllun bad ki shnong ba markhap bad kiba kynthup ruh ïa ka shnong Nongrah.
“Kumba ngi tip bad ngi sakhi, u drok u la rung lut ha ki kyndong kynshrot jong ki shnong ki thaw ha kylleng ka Bri u Hynñiewtrep bad ngi ïohi bad sakhi ïa ka jing jyllei ki nongtuh, ki nonglute bad wat ki nongpynïap briew namar ki la kyrni palat ban dih ïa une u jingdih pynbuaid. Katba kiba ïoh kem ïa ki nongtuh nonglute ki dei beit kiba la kyrni ha une u jingdih pynbuaid ba shyrkhei,’ la ong ka Seng ha u kyrwoh ba la phah ba la phah da u General Secretary ka KSU Nongthymmai Circle u Samla Ribansing Nongrum sha ki lad pathai khubor.
Ka Seng ryngkat ka jingïatreilang bad ki Dorbar Shnong, ki Seng Kynthei bad Seng Samla jong ki Shnong kiba hap hapoh ka jylli treikam jong ka Circle ngi la pyrshang lut la ka buit ka bor ban khanglad bad ban pynduh jait ïa une u jingdih uba pynjot ïa ki khun samla jong ka jaidbynriew bad ïa ka imlang ka sahlang hi baroh kawei,” la ong ka Seng.
“Kumta ngi tyrwa ïa ka Dorbar Shnong Nongrah ryngkat bad ki Seng Kynthei bad Seng Samla jong ka shnong ba ngin ïatrei ryngkat ryngkat khnang ba ngin lah ban tem ïa kiba bun ki jingsniew kiba sdang kynrei bad bsut khlieh bad ban wanrah pat ïa ka shongsuk shongshngaiñ jong ki shnong bad ka thaiñ hi baroh kawei,” ong u kyrwoh na ka seng.
Ka seng ka la pynrem jur ïa ka jingbthat jubor jong u Kpa ïa ka jingim jong ki arngut ki khun kiba dei shipara kaba la jia dang shen ha ka shnong Nongrah, Shillong.
“Ka KSU ka pynrem tyngeh ba kum kine ki jingjia kim dei shuh ban jia bad kyntu ruh ïa ka tnad Pulit ban kham pynkloi ïa ka jingtohkit khnang ba une u riewthrang snam un ïoh ïa ka jingsajia kaba tyngeh katkum ki kyndon jong ka aiñ,” ong shuh shuh ka Seng.
Ha kaba ïadei bad kane ka jingjia, ki dkhot ka KSU Nongthymmai Circle bad ki dkhot jong ka KSU Nongrah Unit ki la leit synran bad pynshngaiñ ïa ka ïing ka sem khamtam ïa ka Kmie jong kine ki khunlung kaba la mad ïa u lyoh ba kahdum ha ka jingim.