Nongpoh, K’Lyngkot 14: Namar ka jingjyllei ki kam thok kam shukor lyngba ki rynsan social media kiba ju pynbiej ban aikam ai jam, pynbiej haki kam die kali bad kiwei kiwei kiba shu jah pat jlang hadien bala ioh pisa, ka HYC Nongpoh Circle hapoh ka jingïalam u Samla Tony Shylla kum u President bad u Samla Nicky Nongsiej General Secretary mynta ka sngi kila leit ban ïakynduh ïa u Addl SP ka Ri-Bhoi District u Bah J Marngar ban ujor namar bun ki paidbah ki shah pynngop khamtam kiba na nongkyndong.
Haba kren sha ki lad pathai khubor u Samla Tony Shylla u la ong ba kine ki jingjia kiba dei la jia la slem naka por shaka por bad bun ngut ki nongwad kam kila ngat ei ha shrip kine ki riew shukor kiba nang ban pynbiej bad pynum mynsiem ïaki paidbah haduh ba kin da ngap bad ngat haki apot shah thok bapher bapher.
Kumta naka liang ka seng kala kyntu ïaki bor pulit lyngba u SP ka Ri Bhoi ba kin buddien bad shimkhia ïa kane ka kam khnang ba ki paidbah kin nym ngat ha kum kine ki apot shah thok shah shukor.
