Jowai, Naiwieng 11: U Myntri Rangbah ka Sorkar Jylla u Conrad K. Sangma ha ka Lah Sngi u Blei u la hiar sha ka shnong Umladkhur kaba hap hapoh ka Amlarem Sub Division, West Jaiñtia Hills District ban jurip kyrpang ïa ka Eklavya Model Residential School (EMRS) kaba ka jingtrei mynta ka ladep kumba 70%.
Ïa ka jingtei jong kane ka skul la bei pisa da ka National Education Society for Tribal Students (NESTS), Ministry of Tribal Affairs jong ka Sorkar India ha ka jinglut kaba kot 45 klur ba la pyntrei da Company WAPCOS Ltd, New Delhi.
Ïa u Conrad K. Sangma la synran da u Myntri ka tnad pule puthi ka Sorkar Jylla u Bah Lahkmen Rymbui, ki ophisar na ki tnad treikam sorkar bapher, kumjuh ki nongïalam bad ki dkhot nongkitkam shnong.
U Myntri Rangbah ha ka jingjurip ula ong lyngba ka jinglah ban pyndep ïa kane ka skul kan kyntiew shibun ïa ka pule puthi ha ka thaiñ bad kan shakri ïa ka imlang sahlang na ka bynta ka lawei jong ki khynnah.
U la bthah ruh ïa ki kontraktor bad ki heh ophisar ba kin pynsted ïa ka kam khnang ba ka skul kan sdang noh ha u snem 2026.
