Jurip u Myntri ha East Jaiñtia ïa ki jingtreikam ki skhim ka Sorkar Pdeng

Khliehriat Jylliew 11: U Myntri jong ka sorkar pdeng, uba dei peit ïa ka Ministry of External Affairs bad ka tnat pule puthi, u Rajkumar Ranjan Singh, ha ka jingwan jurip jong u kaba ar sngi ïa ka East Jaiñtia Hills District, u la ioh ban bishar bniah bad sakhi da lade ïa ka rukom pyntreikam ïa ki skim jong ka sorkar pdeng kiba la dep pyntrei bad kiba dang pyntrei hapoh East Jaiñtia Hills District bad la pynlong ruh ïa ka jingialang (Review Meeting) ha Conference Room ha ophis u Deputry Commissioner ha Khliehriat.
Haba kren ha ka jingialang, u Rajkumar Ranjan Singh, u la ong ba ki don ki skim kiba wan na ka sorkar pdeng ki dei kiba la pyntrei bha, hynrei ka dang i donkam bha ban pynjur shuh shuh ïa ki jingai jingpynshai lyngba ki awareness prokram khamtam ha kaba iadei bad kito ki skim kiba dei bad ki kynhun jong ki kynthei bad bad ha ka imlang ka sahlang.
Shuh shuh haba kren halor ka phang kaba iadei bad ka pule puthi, u la pynkynmaw ba baroh ki nongshong shnong jong ka ri ki don ka hok ban ioh ïa ka jingnang jingstad bad kane ruh ka dei kaba katkum ka riti synshar jong ka ri India bad ka dei ka kamram jong ki bor synshar district khamtam eh ka tnat pule puthi ban pyndonkam ïa ki lad ki lynti ban kyntiew ïa ka pule puthi ha ki shnong ki thaw bad ha ka district hi baroh kawei.
U la kyntu ïa ki bor synshar district bad ïa baroh ki heh sorkar ba ki dei ban ai ïa ki jinghikai kiba naduh tynrai ïa ki kynhun bapher bapher jong ki kynthei ka ban long ruh kum ka jingpynkup bor ïa ki kynthei.
Ha ka jingjurip ïa ka shnong ïongkaluh utei u myntri ka sorkar pdeng u la jurip ïa kawei ka check dam kaba la pyntrei lyngba ka skim MGNREGA ba la iatrei synrop lang bad ka tnat Meghalaya Basin Development Authority, u la jurip ruh ïa ki iïng kiba la shna lyngba ka skim PMAY-G-Scheme.
Ha kajuh ka sngi u la jurip ïa ka shnong Moolamylliang kaba dei ka shnong kaba khuid tam ha ri lum Jaiñtia ha kaba u la thung ruh ïa uwei u tynrai dieng, hangne u la ioh ruh ban ïakren mar khmat bad ki dkhot jong ka Self Help Group.
Ha ka jingjurip ïa ka Financial Literacy Camp kaba don ha shnong Rymbai, hangne ruh u myntri u la ioh ban ïakren bad kito kiba ioh jingmyntoi na ka skim Pradhan Mantri jan-Dhan Yojana (PMJDY), ka skim MGNREGA (Job Card), Pradhan Mantri Ujjwala Yojana(PMUY), ka skim Pradhan Mantri MUDRA Yojana bad kiwei kiwei ki skim kiba dei ki skim kiba wan na ka sorkar pdeng.
U Depury Commissioner ka East Jaiñtia Hills District, u Abhilash Banarwal.IAS u la pynsgew ïa ki mat treikam bapher bapher kiba wan na ka sorkar pdeng bad kiba la pyntrei da ki tnat sorkar jong ki ophis bapher bapher, u la maitphang halor ka skim Ayushman Bharat, PMMVY, MGNREGA, PMAY-G, PM- KISAN, Jal Jeevan Mission(JJM), Sarva Shiksha Abhiyan, Poshan Abhiyan, National Food Security Act(NFSA), PMGKAY, ka skim Mid Day Meal (Rice) bad ka Swachh Bharat Mission- Gramin.
Kiba la ïa don ryngkat lang ha ka jingialang ki kynthup u Officer on Special Duty jong u myntri ka sorkar pdeng, u D.K. Singh, , u Addl. Deputy Commissioner, East Jaintia Hills District, u bah S.S.Syiemlieh, MCS, ki Block Development Officers jong ka Wapung bad Saipung C&RD Block, u Dr R.Pyrtuh bad u Dr T Shylla lem bad kiwei kiwei ki heh sorkar jong ka district.