Nongpoh, Nohprah 04: U Bah Damanbait Lamare MLA ka Umroi mynta ka sngi ryngkat ki ophisar ka tnad PWD Umsning Division kila leit ban jurip ïaka jingkieng ba dang shna thymmai ha Umiam kaba la jan dep bad sah satang ban ñiat rong bad pynitynnad bad ban siang rong ïaki bynta u surok ha katei ka jingkieng.
Kum ban shu kdew hangne ba ïa katei ka jingkieng bad surok ha la pynmang pisa haduh T.23 klur tam bad la khmih lynti ruh ba ka por ban pyndep kan long hapoh 24 bnai, hynrei ha kane ka sngi ka jingjurip kala pynhun bad pynkmen ïa u MLA bad ki ophisar ka tnad PWD halor ka jingïaid beit jong ka kam bad tang hapoh 7 bnai katei ka jingkieng bad surok kala jan poi shaba dep noh.
Haba kren ha kane ka sngi naka liang u Bah Damanbait Lamare u la pynpaw ka jingsngewkmen kaba khraw bad ai jingïaroh ïa u kontraktor ba pyntrei ïa katei ka kam halor ka jingsted jong ka kam bad khamtam eh kumba katei ka jingkieng ka dei kaba la donkam ban pyndep noh.
Shuh shuh u la ong ruh ba ynda la dep ban shna ïa katei ka jingkieng kan pynsuk shikatdei ïaki kali heh ban ïaid namar kumba long mynta ki kali heh kim lah ban ïaid lyngba ka jingkieng rim ha Umiam, namar ka jingma, bad ynda la dep katei ka jingkieng wat ki Night Super kin sa ioh ban ïaid lyngba bad lah ruh ban pyntreikam bha ïaka ISBT kaba don ha Mawiong.
