Nongpoh, Nailar, 22: Kum u MLA ka Nongpoh Constituency u Bah Mayral Born Syiem mynta ka sngi u la leit ban ïa kynduh ïa ki nongïalam ka Shnong Pahamrïoh na ka bynta ban ïa kren halor shibun ki kam pynroi bad ha kajuh ka sngi ruh u la leit ban jurip ïa ka Pahamrïoh Govt LP School kaba la donkam ban ïoh noh da ka jingtei kaba thymmai.
Ha kane ka jingleit jurip u MLA ïa katei ka shnong la don ryngkat ruh naduh u Rangbah Shnong u Bah Nilson N Ryndongsngi, u Bah Riskhembha Suting Secretary Shnong, u Bah Watborlang Kshiar Head Teacher ka Pahamrïoh Govt. L.P School lem bad kiwei ki riew rangbah.
Ha kane ka jingleit jurip ïa katei ka shnong, ka la long ruh ka jingkmen na ka bynta ki paidbah nongshong shnong ka shnong Pahamrïoh, namar na ka liang u MLA u la aiti ruh ïa ka work order kaba T. 3 lak lyngba ki skhim pynroi u MLA ban tei ïa ka ïing Dorbar ba thymmai ka Shnong Pahamrïoh.
Shuh shuh, lyngba jong kane ka sngi, ka la long ruh ka jingkmen ïa ki bor pynïaid shnong bad ruh ïa ki bor pynïaid skul, namar na ka liang u Bah Mayral Born Syiem kum u MLA u la kular ruh ban pynoh noh da ka ïingskul ba thymmai ha Pahamrïoh Govt. LP School, kaba dei kawei na ka skul kaba ai jingnang jingstad ïa ki khynnah bad ruh kaba la donkam ban maramot ne pynbha khnang ba ki khynnah skul kin ïoh ïa ka kamra Klas kaba paka.
Ha kane ka sngi, na ka liang u MLA u la pynpaw ïa ka jingsngew nguh ïa ki Nongïalam Shnong lem bad ki dkhot ka School managing Committee ba ki la treishitom ban nang pynkhreh ha kaba ïadei bad ka jaka ban tei ïa ka Ïing skul kaba thymmai bad kum u MLA u la kular ruh ban nang trei shitom ban pynïoh ïa ka mang pisa khnang ba kan long ka jing myntoi naka bynta kiba pule ha katei ka School bad khamtam ïa ki longïing kiba duna ha ka ïoh ka kot kiba dang shaniah ïa ka jingnang jingstad na katei ka School.
