Jurip u MLA bad bor distrik ïaka jaka bret ñiut ha Byrnihat

Nongpoh, Nailar 09: Namar ka jingud jong ki paidbah ka thaiñ Byrnihat halor ka jingsma kaba mih naka jingbret pathar ïaki jaboh jabaiñ bala isaitmet ban peit khamtam kaba dei ruh harud surok bah National Highway, u MLA ka Jirang Constituency u Bah Sosthenes Sohtun, u Bah Victor Ranee MDC, ryngkat ki bor distrik haka jingdonlang u Bah M Tongper ADC, Ki nongïalam shnong hapoh ka Synjuk ki Dorbar Shnong Byrnihat Area mynta ka sngi kila leit ban jurip syndon ïa katei ka jaka kaba ki paidbah ki pynlong kum ka jaka bret ñiut harud surok bad kumjuh ruh ha iew Byrnihat.
Katei ka jingleit jurip jong u MLA bad bor district ryngkat ki nongïalam shnong ka dei ruh namar ka jingsngewkhia kaba jur halor ka jingbret pathar jong ki paidbah ïaki jaboh jabaiñ ha katei ka jaka kaba don ha lad Narbong kaba la pynlong kum ka jaka bret ñiut kaba lah pat ban wanrah jingma ïaki paidbah ha kaba ïadei bad ka koit ka khiah naka jingsma iwtung kaba mih na katei ka jaka bad la sakhi ruh ka jingbret pathar bad ka sma iwtung ba shyrkhei ha Iew Byrnihat.
Haba kren sha ki lad pathai khubor hadien ka jingleit jurip naka liang u Bah Sosthenes Sohtun kum u MLA u la pynpaw ka jingsngewkhia halor ka jingbret pathar jong ki paidbah ïaki jaboh jabaiñ bala isaitmet wat tang ban peit ha katei ka jaka khamtam ba ki nongleit nongwan ki iohi ïaka jingjaboh kaba don harud u surok bah National Highway kaba dei ruh ka khyrdop ban rung sha ka jylla.
U la pynpaw ruh ka jingeh kaba khraw ba haduh mynta kam pat don ka jaka theh ñiut kaba paka ha katei ka thaiñ wat la kum u MLA u la ju pynsngew sha ka sorkar ban phah jingthoh ruh naka bynta ka jingdonkam jong ka jaka bret ñiut kaba paka ha katei ka thaiñ hynrei kum ki paidbah kim dei pat ban leh khlem akor ban bret ïaki jaboh jabaiñ sha surok hynrei ban don ka jingkitkhlieh naka bynta ka khuid ka suba ban shna ïaki jaka bret ñiut hala ki jong ki iing ki sem, ym ban bret pathar sha ki surok.
U la ong ruh ba kum u MLA un sa phah jingthoh biang sha ka sorkar naka bynta ban pnyioh kawei ka jaka bret ñiut haka thaiñ Byrnihat naka bynta ka jingbit jingbiang jong ki paidbah ba kin ioh ban bret ïaki ñiut ban lait naka jingbret pathar sha ki surok.
Naka liang u Bah Johny Syiem Secretary ka Synjuk ki Dorbar Shnong Byrnihat Area u la ong ba katei kam dei shuh ka jingeh kaba dang thymmai kaba ki paidbah ka thaiñ Byrnihat ki ïakynduh bad ka long ruh ka jinglehraiñ ïaki nongïalam shnong namar ym tip mano ba bret bad pyn jakhlia ïa katei ka jaka hynrei la shu iohi ba ki jaboh kila nang bun katba nangmih ki sngi nalor ka jingsma kaba shyrkhei kaba lah ban ktah ïaka koit ka khiah ki paidbah.
Naka liang ka synjuk ryngkat ka jingkyrshan lang jong u MLA kila kyrpad sha ka sorkar ba ka dei ban sngew ban sngap ïaka jingud bad ka jingdonkam jong ki paidbah ha katei ka thaiñ naka bynta ka jingbit jingbiang jong ki paidbah, u la bynrap.