Guwahati, Nailar, 10: U District Commissioner (DC) jong ka Kamrup u Dev Kumar Mishra ha ka sngi u Blei u la hiar jurip ïa ka Nam-Tarabari bad ka Upper Tarabari, ki ar tylli ki shnong kiba don ha khappud ka Assam–Meghalaya ha ka bynta jongka Kamrup District, ban lum jingtip halor ka jingïakajia pud bad ban ïakren ruh bad ki nongshong shnong.
Ka jinghiar jurip jong u DC ka long ban bishar bniah ïa ka jinglong jingman ha kine ki shnong bad ban pan ïa ki jingai jingmut na ki paidbah.
Ka thaiñ Nam-Tarabari bad Upper Tarabari, watla ki don hapoh ka jylla Assam, hynrei la bun snem ki la don hapdeng ka jingïakajia namarba katto katne ki bynta la kam trai da ka Meghalaya. Kine ki jingkam, ki nongshong shnong ki la kynnoh ba ki dei lyngba ki jingpyrshang ban kyntur pud.
Ha ka jingjurip la synrang lang ïa u Mishra da u Additional District Commissioner u Garg Mohan Das, u Additional Superintendent of Police u Kalyan Pathak, bad ki heh ophisar na ki tnat treikam bapher bapher.
Ha ka jingïakren bad ki nongshong shnong, ki bor synshar distrik ki la kular ban shim ïa ki lad ki lynti ban pynkhlaiñ ïa ka jingdon jong ki tnat treikam ka Assam bad ban weng ïa ki jingïakajia pud lyngba ki bor Sorkar.
Ynda la leit phai, u Mishra u la leit jngoh ïa ka ophis Sub-Divisional Commissioner kaba don ha Boko, kaba la buh sngi ban plie ha ka 12 tarik mynta u bnai.
