Shillong, Naiwieng 11: U Myntri Rangbah ka Jylla Conrad K Sangma ha ka taiew ba la dep ha ryngkat ka jingdon lang u Deputy Commissioner ka West Garo Hills, Vibhor Aggarwal lem bad kiwei kiwei ki heh Sorkar u la leit ban jurip ïa ka PA Sangma Sport Complex kaba don ha Tura kaba ka jingpyntrei mynta ka dang ïaid shakhmat.
Ha kane ka jingleit jurip u Myntri Rangbah u la shong bishar bniah ïa ka jingtei jong ki bynta bapher bapher jong ka projek kynthup naduh ka Indoor Stadium bad Indoor Swimming Pool.
Haba kren ha kane ka sngi, u Myntri Rangbah u la ïathuh ba ha ka jingjurip ïa ka PA Sangma Integrated Sports Complex ha Tura ki la sakhi ba ka madan phutbol ka la dep ban shna bad ka la treikam ruh mynta.
“Ha kane ka Complex kan don ruh ka Indoor Swimming Pool, Indoor Badminton, Basketball bad ka Volleyball Courts. Kane ka projek kan long ka jingkyrkhu ïaka thaiñ bad kan dei ruh shi bynta haka jingpynkhreh ïa ka National Games 2027,” u la ong.
U Myntri Rangbah u la pyntip ruh ba ka jingpyntrei ïa kane ka projek ka dang ïaid shaid shaid bad la khmih lynti ban pyndep noh ha u snem 2026.
Ka PA Sangma Integrated Sports Complex kadei ka Sports Complex ïa kaba la saindur ha ka rukom kum kiwei ki Sports Complex ha kiwei ki ri jong ka pyrthei namar kin don bun tylli ki jingdonkam kynthup ka Football Stadium, Indoor Stadium bad Indoor Swimming Pool.
Kane ka Complex kan long kum ka jaka ba kongsan tam na ka bynta ka jinghikai, ka jingïakop, bad ka jingkyntiew ïa ki bunjait ki jingïalehkai ha rilum Garo baroh kawei.
