Shillong, Naitung 31 : U MLA ka Mawlai Konstitwensi u Bah Process T Sawkmie ha ka sngi Balang ka 27 tarik u Naitung, 2022 u la ïalam ïa u Chief Engineer jong ka State Sports Council Meghalaya (SSCM), Bah B. M Syiem ban jurip ia ki madan ha Mawlai, kawei ha Mawtawar bad kawei ha Mawsiatkhnam. Haba kren ha Mawtawar u MLA u la pynpaw ba ka jingïalam jong u ïa u CE ka long ban shna ïa ka stadium ba don ki jaka shong (Gallery), ka synthetic track ban mareh race bad kiwei ki jingdonkam kaban ïaryngkat kyrdan bad ki madan kiba lah ban pynïalehkai haduh ki jingïalehkai ka ri ki national.
U la pynpaw ba kum u nongmihkhmat u la ïohi ïa ka jingeh ki samla haba ïa dei bad ka madan bad ki shem jingeh bha ban ïoh madan ban kilanmet ha kine ki sngi kiba mynta. U la ong, mynshuwa bym pat siang Turf ïa ka madanheh, dang ïoh ban ïalehkai bun ki jait jingïalehkai, dang ïoh pynlong prokram bapher kum ka jingïaseng, shad Seng Khasi bad kiwei, hynrei mynta ka madanheh ka la long beit thik tang na ka bynta ka phutbol, kata ruh hap siew.
U kyrpad ïa ka sports department ban phai khmat sha ka madan Mawtawar bad kumjuh ïa ka Mawsiatkhnam ban pynbha ïa ka madan ban ïoh ban kyntiew ïa ki kam ïalehkai ha ka thaiñ. U pyntip ba un sa buh jingtyrwa (Proposal) bad aiti sha ka sport department haba ïadei bad kine ki madan bad un sa buddien ïa kine haduh ba kan da urlong.
Haba kren hadien ba jurip u CE Bah Syiem u la pynpaw ba un sa phah ïa ki engineer ban sorbe ïa ka madan baroh ar tylli bad kin sa shna pat ïa ka estimate ne ka mang tyngka katno kan lut kan sep haba ïadei bad kine ki madan.
Ha kane ka sngi la ïoh ruh ïa ka jingkren na u Bah Cornelius, Bah Peter, Bah Shemphang, Bah Wanlankupar Lynrah, Secretary Shnong Mawsiatkhnam bad kiwei, kiba la ai khublei ïa u MLA uba la shimkhia ïa ki madan na ka bynta ba ki khynnah kin ïoh ban ïalehkai.
