Khliehriat, Naiwieng, 19: Ki nongtrei jong ka tnat Food and Civil Supply ba la lamkhmat da ka Kong E.V. Pariat, u Sub Inspector Supply Bah M.S.S Sohklet ryngkat ka jingsynran lang jong u SDO Sadar ka East Jaiñtia Hills District u A. Verma ha ka sngi Baar ki la hiar jurip bad tohkit bniah ïa ki dukan die marbam kiba don ha ka thaiñ Ladrymbai.
Kane ka jingjurip ka long na ka bynta ban tehlakam ïa ka jingshim kabu jong ki nongdie marbam kiba ju die palat ïa ka dor bad ka jingdie ïa ki mar kiba la kut ka tarik.
Ha ka jingjurip, ki nongtrei jong ka tnat Food and Civil Supply ki la lap ba ki don katto kattne ki dukan ha ka thaiñ Ladrymbai kiba die ïa ki tiar kiba ym shym la thoh satia ïa ka tarik ban pyni la ka la kut neem ka por. La maham tyngeh ïa ki trai dukan ba kim dei ban buh kum ïa kine ki jait tiar kiba ym don ïa ka tarik bad lada lap shuh shuh kum ïa kine ki dukan, ka tnat treikam jong ka Sorkar ha East Jaiñtia Hills District kaba dei peit ïa ki marbam mardih kan shu khang khyrdep ïa ki dukan.
Ki sorkar kin sas leit jurip shuh shuh na ka por sha ka por ïa ki dukan die marbam namarba ka jingdie ïa ki marbam ka long kaba kongsan ha kaba donkam ban long phikir bha ban tip ruh ba kumno ki marbam ki long khnang ban nym ktah ïa ki paidbah.
U Bah Sohkhlet u la ong ba ka ophis ruh kan nym ailad ban don kino kino ki dukan kiba die ïa ki marbam kiba la kut ka tarik bad kiba la sniew sha ki paidbah.
“Lada ngi lap ïa kano kano ka dukan kaba die ïa ki tiar ne ki mar bam kiba la palat ka tarik, ïa kata ka dukan yn sa khang khyrdep noh ïa ki,” u la ong.
Ha kane ka jingjurip la don lang ki nongïalam ka Meghalaya People United Front (MPUF), East Jaiñtia Hills District.
U President ka MPUF, East Jaiñtia Hills District Bah Kyrshan Blah u la ai ka jingïaroh ïa ka jingkloi jong ka tnat Food and Civil Supply ban shimkhia ïa ka kam bad ban phah jurip ruh ha ki nongtrei ïa ki dukan die mar bam kata hadien ba ka seng ka la buh da ka jingthoh.
