Jurip ka Myntri sorkar Pdeng ban bishar bniah ïa ka jingtreikam bha ka skhim JJM ha WKH
Nongstoiñ, Jylliew 12: Ka Myntri Sorkar Pdeng ba dei peit ïa ka Ministry of Health & Family Welfare bad ka Ministry of Chemicals & Fertilizers, ka Anupriya Patel, ka la wan ban jurip ïa ka West Khasi Hills District ban peit bad bishar bniah ïa ki skim sorkar pdeng bapher bapher kiba la pyntrei hapoh ka district.
Ha kane ka jingwan jong ka, la pdiang burom ïa ka da u Bah Garod L.S.N. Dykes IAS, Deputy Commissioner ka West Khasi Hills ryngkat bad ki Additional Deputy Commissioner (ADC), ki Block Development Officer (BDO), Superintendent of Police bad ki heh sorkar na ki tnad Sorkar bapher bapher.
Ka Anupriya Patel nyngkong eh ka la leit sha ka shnong Khyllem Tiehsaw, ban jurip bad peit bniah dalade ïa ka jingpyntreikam ïa ka Jal Jeevan Mission hapoh katei ka shnong. Ka la pynpaw ka jingsngewkmen halor ka rukom pyntrei ïa kane ka skhim, ha kaba la lah ban ai um sha man ki longïing ha ka shnong. Ka la leit ruh ban jurip ïa ka jingpyntreikam ïa ka MGNREGS bad ka skim PMAY-G ha ka shnong Sohpian.
Hadien kane, la pynlong ïa ka jingïalang ha Conference Hall jong ka ophis u Deputy Commissioner, na ka bynta ban ïatai bad bishar bniah halor ki skhim sorkar pdeng kiba la pyntreikam hapoh West Khasi Hills District. Ïa ki jingtip kiba mih na kane ka jingïalang, kan sa leit rah sha Delhi khnang ba yn lah ban wanrah shuh shuh ïa ka roi ka par kaba myntoi ïa ki paidbah jong ka district.
Ka Myntri Sorkar Pdeng ka la kdew ruh ba ka thaiñ Shatei Lammihngi (North East India), ka dei ka thong ba kongsan tam jong ka Sorkar Pdeng hapoh ka jingïalam jong u Myntri Rangbah Duh ka Ri, u Narendra Modi. Ka la ong ba ka North East ka don bynta kaba khraw ha kaba ïadei bad ki kam thaw aiñ bad ha ka saiñ pyrthei jong ka ri.
Ka la ong ba la kheiñ ruh ïa kane ka thaiñ kum ka khyrdop ban rung sha South East Asia. Ha kine ki 11 tylli ki snem ba la leit noh, la sakhi ïa ka jingkylla kaba khraw ha kiba bun ki liang kynthup ïa ki surok, ka kamai kajih bad kiwei pat. Ka Sorkar Pdeng ka kwah ban ïohi ba kane thaiñ kan nang kiew shaphrang bad wanrah jingmyntoi sha ka roi ka par jong ka ri baroh kawei.