Jurip ka MLA Sutnga-Saipung ïa ki jingpyntrei ïa ki project ha ki jaka ba hap hapoh ka Saipung C&RD Blcok EJHD

Khliehriat rymphang 2: Ka MLA jong ka Sutnga –Saipung ka kong Santa Mary Shylla ha ka jingsynran lang u Deputy Commissioner, East Jaiñtia Hills District, u Manish Kumar, IAS,, u Block Development Officer, Saipung C&RD Block, Dr R. Pyrtuh, Executive Engineer,  (PWD) Roads, Khliehriat Division, u bah G. Langstang, u Engineer, District Mineral Foundation Trust, bah Dapmain Nongtdu, u District Project Manager, District Project Management Unit (MBMA), East Jaiñtia Hills District, ka kong Pynhunlang War lem bad kiwei kiwei ki heh sorkar mynta ka sngi ka la pynlong ïa ka jingjurip ïa ka jingpyntrei ïa ki project bapher bapher ba la pyntrei ha ki shnong bapher bapher kiba hap hapoh Saipung C& RD Block.
Kane ka jingleit jurip ka long halor ka jingthmu ban pynbha ïa ki kam ki jam ba puntrei khnang ba ka jingpyntrei kan long kaba paka bha ka ban long na ka bynta ka jingmyntoi ki paidbah nongshong shnong, ha kane ka jingleit jurip la ïa don lang ruh ki contractorkiba pyntrei ïa ki project lem bad ki nongmihkhmat na ki shnong.
Ka MLA ka la jurip ïa ka surok Sutnga -Sumer Road, kaba dang pyntrei, kumjuh ruh ïa kawei ka jingkieng dewbilat (RCC Bridge) ba la pyntrei lyngba ka skim Pradhan Mantri Gram Sadak Yojana (PMGSY) bad kane ka jingkieng ka dei kaba pyniasoh ïa ka shnong Samasi, Moolait, Mookhain bad kiwei kiwei ki shnong.
Haba ka MLS, ka kong Santa Mary Shylla ka la ïakren bad ki nongpynïaid shnong ka la don ka jingpynsngew ha kaba ka la mih ka jingsngew khia na ka liang ki nongpynïaid shnong namar ka jingbym biang bha ka rukom siang rong ïa ka surok, kumjuh ruh ka jingbym biang ki kynroh, ki nala tuid um ha rud surok bad namar ka jingbym biang ki nala ka um ka ju lynshop pathar ha surok, kumta halor kane ka MLA ka la kyntu ïa ki contractor ba kin pyntrei bha khnang ba ka jingtrei kan long kaba neh bad kaba skhem.
Shuh shuh ka kong Santa Mary Shylla lem bad ki heh sorkar ki la leit jurip ruh ïa ka ïew ha shnong Samasi kaba la pyntrei lyngba ka Meghalaya Basin Development Agency ( MBDA) kaba hapoh ka MEGHLAMP Project bad ba la ïa treilang ruh bad ka North Eastern Council (NEC) lem bad ka MBDA ha ka jinglut kaba  T40.48 lak tyngka bad T5000000 (Sanphew lak tyngka) na ka NEC, ha kane ka jingjurip la lap ba ki don ki bynta kiba la lah ban pyndep bad ki don ruh ki bynta kiba dang sah, kumta ka MLA ka la bthah ïa ki tnat sorkar kiba dei peit ba kin buddien ïa ki kam bad kane ka project ka kynthup ruh ïa ka Collective Marketing Centre kaba don ka jingthmu ban iarap ïa ki nongrep ba kin ioh ban buh ïa ki mar rep jong ki bad ba kin pynïaid ïew ïa ki mar rep.
Ka MLA lem bad ki heh sorkar ki la leit jurip ruh  ïa ka Health Sub-Centres ha Samasi bad ha Pala khnang ban lap la ki don ne em ki doctor, ki dawai bad kiwei kiwei ki jingdonkam kiba na ka bynta ka koit ka khiah, la jurip ruh ïa ka Digital Library kaba don ha shnong Samasi ba la shna da ka ophis jong u Block Development Officer, Saipung C&RD Block.
La jurip ruh ïa ka madan Futsal kaba la shna lyngba ka skim kaba wan na ka District Mineral Foundation (DMF).
Kiwei kiwei ki jaka ba la jurip ki kynthup ruh ka jingkieng Bri Manar  kaba don ha shnong Samasi, ka jingpyntrei ïa ka  Artificial Football Ground, ka Anganwadi Centre ha shnong Krem Myrsiang Village bad  ka jingpyntrei ïa ka Jalaphet Government College.