Ampati, Jylliew, 22: Ka MLA jong ka Mahendraganj Constituency ka Dikkanchi D.Shira ha ka Lah Sngi u Blei ka la hiar jurip ïa ki shnong kiba la shah ktah ha ka jingshlei um ha Lukaichar bad Kalaichar kiba hap hapoh ka Mahendraganj Constituency, South West Garo Hills.
Ha ka jingïakynduh bad ki lanot ba la shah ktah ha ka jingshlei um, ka Dikkanchi ka la shimkhia ban sa pynsngew sha ki tyndong skhor jong ka Sorkar Jylla khnang ban pynïoh jingïarap ïa ki paidbah kiba la shah ktah bad kiba la mad ruh ha ki jingshah lynshop jong ki bor ka mei mariang.
Ka la ïathuh ba ka party ka la phah ïa ki nongtrei ban leit ai jingïarap ïa ki paidbah kiba la shah ktah na ka jingshlei um khnang ban pynpoi ïa ki marbam mardih bad kiwei kiwei de ki jingdonkam.
Kat haduh mynta, palat san lak ngut ki briew ha baroh kawei ka jylla ki la shah ktah na ka daw ka jingshlei um bad ka jingtwa khyndew kaba la jia ha ki shnong bapher bapher naduh u bnai Ïaiong, mynta u snem.
