Jurip ka MHRC ïa ka Jowai District Jail, lap ba khapngiah palat ka jingset ia ki koidi

Shillong, Nailar, 05: U Chairperson ka Meghalaya Human Rights Commission (MHRC) u Justice T Vaiphei mynta ka sngi Thohdieng, ula leit ban jurip ïa ka District Jail and Correctional Home kaba don ha Jowai, West Jaintia Hills.
ïa u Justice T Vaiphei la synran lang da ki dkhot ka MHRC, B Giri bad PJP Hanaman bad secretary F.M Dopth.
Ka Commission ka la sakhi ba kane ka District Jail bad Correctional Home Jowai ka long kaba khapngiah bad ka la tam ïa ka jingmang ban set 120 ngut ki koidi namar ha kane ka phatok la set haduh 298 ngut ki koidi.
Ka Commission ka la bthah ïa u Deputy Superintendent jong ka District Jail bad Correctional Home Jowai ban pynkylla shipor ïa ka Hall jong ka Vocational Training kum ka jaka sah jong ki koidi na ka bynta ban pynkylluid ïa ka jaka sah.
Ka Commission ka la pynpaw ba ïa ka jaka Training la dei ban kynriah shwa sha ka Video Conferencing Room namar la shem ba ka kham heh ka jaka.
Ka Commission ka sngew ba ka sorkar ka la donkam ban tei sa da kawei ka ïing ban kham pynkylluid ïa ki jaka sah lane ki Ward.
Tang kawei ka jaka leit shabar ha man ki jaka sah (Ward) kaba buh jingeh na ka bynta ki 50 ngut ki koidi kiba la shah set ha kawei ka Ward bad ka long kaba donkam kyrkieh ban tei jaka leit shabar thymmai naka bynta kawei ka Ward.
Ka Commission ka la bthah ïa u Deputy Superintendent ban pynbiang ïa ka kaiphod halor ka jingsahteng ki case pyrshah ïa ki koidi na ka bynta ban ailad ïa ka Commission ban rah ïa kine ki case sha ka Legal Service Authority pynsted ban pyndep tian bishar.
Kane kan dei ruh ka sienjam ban kham pynkylluid ïa ka patok. Ha kajuh ka por ka Commission kam sngewtynnad satia ban ïohi ba u Medical Officer jong ka phatok u khlem wan ha ka por ba wan jurip namar ki don bun ngut ki koidi kiba donkam ka jingkhmih haba ïadei bad ka koit ka khiah.