Jurip ka ka Estimate Committee ki MLA ïaki jaka pule ba dang sah khongreng ha Ri-Bhoi

Nongpoh, Nailar 18: Ka Estimate Committee jong ka Meghalaya Legislative Assembly hapoh ka jingïalam u Bah Mayral Born Syiem MLA ka Nongpoh kum u Chairman mynta ka sngi kila leit ban jurip ïaki jingtei ba dang sah khongreng ha Ri-Bhoi ba kynthup ïaki 2 tylli ki shlem ai jinghikai ka Polytechnic bad ka Industrial Training Institute kiba don hapoh ka Raid Nongkhrah, Nonglyngdoh bad kumjuh ruh ïaka ophis jong ka Umsning C&RD Block kaba dang ïaid shaid shaid mynta ha Umsning.
Ha katei ka sngi ka jingjurip ïa kitei ki jingtei jong ka sorkar naka bynta ka jingmyntoi jong ki samla pule bad ki paidbah la sakhi ruh da ka jingdonlang ki dkhot katei ka Committee ba kynthup ïa u, Bah Charles Marngar MLA ka Mawhati, Wailadmiki Shylla MLA ka Jowai, u Bah Adelbert Nongrum MLA ka North Shillong, u Remington G Momin MLA ka Rambrai Jyrngam ryngkat ki heh ophisar naki tnad sorkar bapher bapher, ki nongïalam shnong bad haka jingjurip ïaka ophis treikam jong ka Umsning C&RD Block la sakhi ruh da ka jingdonlang u MLA ka thaiñ u Dr. Celestine Lyngdoh.
Naka liang katei ka Committee nyngkong kala leit ban jurip ïaka ITI, kaba la mang pisa haduh 1.23 klur ka ban ai jinghikai ruh ha 4 tylli ki trade ba kynthup ïaka Electrician, Fitter, Mechanic Diesel bad Welder hynrei mynta kala shu long tang ka iingjah namar ka jingbym pat lah ban pyntreikam ïaka namar ka jingbym pat don ki surok ba biang ban poi sha katei ka jaka pule, ki bording elektrik bad kiwei kiwei ki jingdonkam ba hakhmat.
Ka Committee kala leit ruh ban jurip ïaka Polytechnic ka ban ai jinghikai ïaka Course Diploma in Interior Design bad Beauty Culture and Cosmetology bad ka kaba mang pisa haduh 12.30 klur da ka sorkar pdeng bad ka kam mynta ka dang ïaid shaid shaid kumba 90% bad khmih lynti ba shen yn sa lah ban pyndep bad ban plie paidbah noh ïa katei ruh ka shlem pule ka ban jingmyntoi ïaki samla pule ka dong bad ka thaiñ bad naka liang ka Committee kala bthah ruh ïaki ophisar bad ki tnad ba dei peit ba ki dei ban pynkloi katba lah ïaka kam.
Shuh shuh naka liang ka Committee kala leit ruh ban jurip ïaka jingtei ïaka ophis ba thymmai jong ka Umsning C&RD Block kaba la tei haka shnong Dewlieh Umsning, ha kaba naka liang ka Committee kala bthah ba dei ban pyndep noh mardor shuwa u bnai Nohprah, namar ka jingbam por haka rukom trei bad kumba long mynta ki paidbah bad wat ki nongtrei jong ka ophis u BDO ha Umsning ki kynduh jingeh namar ka jingkhapngiah jong ka jaka.
Haba kren sha ki lad pathai khubor naka liang u Bah Mayral Born Syiem kum u Chairman katei ka Committee u la pynpaw ka jingsngewkmen hadien ka jingshimkhia jong ki dkhot ka Committee ban jurip ïakitei ki kam pynroi kiba sahteng hapoh ka district, bad lyngba kane ka jingjurip ngeit skhem kan ïarap shibun ban pynsted ïaka kam naka bynta ka jingmyntoi ki paidbah namar kum ka Committee kan sa rah ïa katei ka kaiphod sha ka sorkar ban pyndep kloi ïa kitei ki kam naka bynta ka jingmyntoi ki paidbah.