Mawkyrwat, Lber, 11: Ki nongïalam ka Federation of Khasi-Jaintia & Garo People (FKJGP) Ranikor Circle ha ka sngi Baar ki la leit jurip ïa ka ophis jong ka Civil Sub Division Ranikor, South West Khasi Hills District hapoh ka jingïalam jong u Working President u Bah Balse Kharbani bad ïohlad ruh ban ïakynduh ruh ïa u SDO ka Ranikor Civil Sub Division Bah K.L. Kynjing
Ha kane ka jingleit jurip ka seng ka lap ba dang don bun ki jingduna ha kane ka shnat treikam jong ka sorkar kata naduh ka Registration Branch, ka Supply Branch, ka Revenue Branch, Excise Branch, Development Branch, ka Disaster Management Branch, ka Public Felicitation Centre Branch, ka Judicial Branch bad ka Nazarat Branch.
Ka seng ka pynpaw ïa ka jingsngewkhia halor ka jingbym don kitei ki tnad treikam ba ki paidbah haduh mynta ki hap ban leit shaduh Mawkyrwat Headquarter kata hapoh ka ophis jong u Deputy Commissioner, South West Khasi Hills District namar ha jingshisha kiwei ki Civil Sub Divisional la ïohi ba kine ki tnad treikam baroh ki don hynrei balei hangne ha Ranikor Civil Sub Divisional kim shem la don haduh mynta watla kane ka Civil Sub Divisional ka la jan kynjoh mynta 8 snem ei ei ïa ka jingdon jong ka, ïa kaba la plie hi da u Myntri Rangbah ka Jyla Conrad Sangma.
Ka Seng ka kyntu ïa ka sorkar jylla khamtam ïa u Myntri Rangbah ka Jylla ba kumba u la plie ïa kane ka Civil Sub Divisional u la dei ban pynbiang noh mardor ïa ki tnad treikam kiba donkam namar da ka jingbymbiang ka pynshem jingeh ïa ki paidbah ba kin leit haduh Mawkyrwat namar ki shnong kiba hap hapoh ka Civil Sub Divisional ki long kiba jngai bad don ruh ki shnong ki hap ban ïaid da ki 4 ne 5 kynta ei ei ban poi haduh Mawkyrwat. Lada don noh ki tnad treikam ba pura hapoh ka Ranikor Civil Sub Division kan ïarap shibun ïa ki nongshong shnong, bad kim donkam shuh ban leit bun bun kynta.
Haba ïakren bad u SDO u la ong teng teng ki paidbah ki sngewthuh bakla namarba don ki por ba um don hapoh ophis, namar u hap ban pyndep kam hapoh ka ophis Deputy Commissioner ha Mawkyrwat. Kumta u ong ba ka pynthut shibun ïa ki paidbah kiba wan donkam ïa u haba hap leit ban trei ar jaka kata sha Mawkyrwat bad ha Civil Sub Division.
Halor kane, ka seng kyntu ïa ki bor dei peit ba ymdei ban pynkhih na kawei ka ophis sha kawei namar kane kan long dkoh ïa jingtreikam hapoh Civil Sub Divisional. Ka Seng kyntu ïa ka sorkar ba la kumno kumno ïa u SDO Civil Sub Divisional ha Ranikor ymdei ban pynmareh na kawei ka jaka sha kawei pat hynrei ai ba un don beit hapoh ka jaka ba la bhah, khnang ba u paidbah ba wan donkam u suk ban ïa kynduh.
Ha kaba ïadei ka ophis treikam ba pura jong ka Civil Sub Divisional haduh mynta kam pat don la ka jong ka ophis kaba paka, ka jaka la dep don hynrei haduh mynta pat ym pat shem la shna ka jingtei kaba paka kumta ka seng ka kyntu ïa ka sorkar ba ka dei ban shimkhia ïa kine ki jingduna hapoh Ranikor Civil Sub Divisional.
Ym tang kata ka seng halor kine ki jingeh bad jingduna hapoh ka Ranikor Civil Sub Divisional kan sa leit ïa kynduh ïa u Myntri Rangbah ka Jylla ban dawa tyngeh ban pynbiang ïa kine ki jingdonkam.
