Jurip ka DC ïa bun ki projek ha SWGH, lap ba baroh ki la treikam katkum ka jingbthah

Shillong, Naitung 29: Ha ki jingpyrshang jong ka ban pynthikna ki jingïaid beit ki jingpyntrei jong ki projek ka sorkar ha ka district, ka Deputy Commissioner, South West Garo Hills ka Hema Nayak, ha ryngkat bad EE (WR) Ampati, ki la leit ban jurip ïa ki katto katne ki projek ka tnat Water Resources, ba kynthup ïa ka Balughat Multipurpose Reservoir Project bad Jhonjona FIP hajan u pud u sam ka India Bangladesh.
Ka Balughat Reservoir Project ka dei kaba la mang hapoh ka Meghalaya Water Development Agency lyngba ka DWRC ha ka shnong Balughat kaba hab hapoh ka Zikzak C&RD Block kaba la tei ha ka snem 2021-2022 bad kumba ka long mynta ka la don ha ka kyrdan ban pyndep noh. Da ka jingheh ka jaka kaba long 66.00 Hactare, kane ka project kan ai jingmyntoi ïa 72 tylli ki longïing ka shnong Balughat bad Mekdual, ha kaba la rep bha ïa u kba ha ka por ba dei ka aïom thung kba, katba 15 tylli ki longïing ki thung ïa u kba Boro ha ka aïom Rabi.
Ha ka jingjurip, la shem ba ki headwork bad ki RCC lined canal bad ka earthen canal, haba ka um kan tuid sha ka command area, la lap ba ki long kiba treikam.
Ha ka jingleit jurip, ka Deputy Commissioner ka la ïasyllok ruh bad ki nongrep bad la ai jingmut ba ki dei ban pynïar ïa ka kam rep da kaba thung ruh ïa u jute ha kane ka thaiñ kumba la leh ha ri Bangladesh da kaba ïathuh ba ka jinglong ka suiñbneng bad ka jingsboh ka khyndew ka ïasynriem ha baroh arliang, ha kaba ïa kane ka jingai jingmut la pdiang sngewbha ruh da ki nongrep. Kumta ka DC ka la kyntu ïa ki ophisar ka tnat Agriculture bad Horticulture kiba donlang ba kin pyni ïa ki nongrep ka buit ban thung ïa u ryndia (jute).
Ka DC ka la pynshlur ruh ïa u Secretary ka IVCS Balughat ban wad ki jingïarap napoh ka ophis jong kane ka ophis ka MBDA/MBMA, Ampati halor kane ka kam rep, ba kynthup ruh hadien ba la dep thung bad ot, bad kumjuh ruh halor ka jingkyrmen ban pynïaid ïew ïa une u jingthung.
Hadien, ka DC ka la leit ban jurip kyrkieh ïa ka Jhonjona FIP, ka Irrigation project kaba la tei hapoh ka AIBP ha ka snem 2018-19 bad ka ban ai myntoi ïa 138 tylli ki longïing ba dei jong ki shnong kum ka Jhonjonagre, Bollongre, Katuligre, bad Jangre hapoh ka Zikzak C&RD Block bad na ka liang ka DC ka la pynpaw ka jingsngewhun ban ïohi ba kine ki projek ki dei kiba la treikam bha bad ka um ruh ka la tuid sha ki jaka rep.