Jurip ka CoRP ia ka jingkieng ha Dwarksuid naba jur ka jingïaid ki trok kit mar

Shillong, Naitung 14:Ka seng Confederation of Ri Bhoi People (CoRP) hynne ka sngi hapoh ka jingïalam u Bah Bandary Ryntathiang President ryngkat ka jingdonlang u Roland Lyngdoh President Nongpoh Circle, bah Shainingstar na Central Zone bad kiwei ki dkhot ki la leit jurip ïa ka jingkieng Dwarksuid ha surok bah Shillong Bypass halor ka jinglong jingman ka jingkieng kaba la orpait bad synjor na ka jingïaid ki trok kit palat pud hadien ba ka jingtwa ka jingkieng nar ne Belly Brigde ba la shna da ka Border Road Organisation (BRO) ka la pra noh tang hadien shisnem.
Haba kren bad ki nongthoh khubor u President ka CoRP bah Bandary Rantathiang ula ong ha ka jingjurip na ka liang ka seng ka lap ba katei ka jingkieng Dwarksuid ka dei jingkieng ba rim naduh ka NEC Road bad la shu pynbha da ka NHAI ha ka por ba shna ïa ka Shillong Bypass bad mynta bun ki jaka ki la orpait bad la lap ba la shu syrdep da ka dewbilat ban pyndam ïa ki jaka orpait bad ka long ka jingma ïa ki paidbah nongleit nongwan namar ym lah ban tip ka lah ban twa ha kano kano ka por.
“Ka seng kan sa wad jingtip lyngba ka hop wad jingtip (RTI) balei ba ka NHAI kam shna ïa ka jingthymmai ha ka por ba shna ïa ka surok Bypass bad balei ka jingkieng Belley Brigde ba T.3 klur ba shna ka BRO ka twa tang hadien khyndiat bnai katba ha ka por ba paw katei jingkieng nar kan shan kumba 10 snem” ula bynrap.
U Bah Bandary u la ïathuh hynne ka sngi ki la bat katto katne ki trok ba ïaid na katei ka jingkieng ba wan na Assam bad Jaintia hills bad ki driver ki ïathuh ba ki kit 20 haduh 40 tone bad ym don satia kiba peit wat la ki bor district ki la mana bad sieh da ka sign board bay m shah ban ïaid ïa ki kali ba kit palat 10 tone naduh ki bnai ba la dep. Hynrei kaba lyngngoh ki trok ba kit haduh 40 tone ki dang ïaid beit haduh mynta bad kane ka jingleh ka sorkar ka pynkulmar ïa ki paidbah nongleit nongwan.
Kumta ula kyntu ïa ka sorkar jylla bad ki bor district ban peit halor kane khnang ba kan ym wanrah ki jingjia ba sngewsih ïa ki paidbah bad lada la shah ban ïaid ki kali palat 10 tone ki bor district ki dei ban weng noh mardor ïa katei ka jingthoh ba mana ban kit palat 10 tone namar ka lah ban wanrah pynban ka jingkulmar ne sngewthuh bakla ïa ki paidbah ka thain naba ki trok ba kit palat palat 10 haduh 40 ki ïaid man ka sngi.
U Bah Bandary ula kyntu ïa ki bor pynïaid district bad ka sorkar jylla ba ïa mynta shipor kim dei ban khang noh syndon ban ïaid ki kali ba kit palat paud, katba ym pat lah ban pyndep ïa ka jingkieng ba dang shna thymmai namar lada katei ka jingkieng ka twa noh kan ktah ïa ki paidbah ka thain Ri Bhoi sepngi bad ka jylla baroh kawei.
Ula ong na ka liang ka seng shen ka sa leit ban kynduh ïa ki bor district ban ïakren halor katei ka mat ban lait na ki jingjia ba sngewsih.
Haba kylli na ki pulit kiba ap ha katei ka jingkieng, ki la pynpaw ba kim lah leh eiei ïa ki kali ba kit palat pud namar ka shong ha ki bor bahalor bad ka kam jong ki long ban peit ïa ka jingïaid beit ki kali ban lait na ka jingsah kut ki kali.