Nongpoh, Naiwieng 27: Namar ka jingjur ka jingñiah thurmur bad ka jingpynher sted ki kali ha shilynter u surok na Nongpoh sha Umden, watla ka jingsiang rong kam pat sdang kaba la buh jingma bad jingsyier ïaki paidbah ba leit ba wan, ki heh pulit ka Ri-Bhoi mynta ka sngi kila hiar sha katei ka thaiñ ban ai jinghikai ïaki nongñiah kali kamai bad kumjuh ruh ïaki paidbah ban long adkar ka rukom ñiah kali ban lait na kano kano ka jingjia ba sngewsih.
Ïa katei ka prokram hikai la pynlong da ka Nongtluh Mathan Marmaiñ Development Forum (NMMDF) ha madan Umden, kaba dei ruh hadien ka jingshimkhia u MLA ka Nongpoh u Bah Mayral Born Syiem namar kila don shibun ki jingujor naki paidbah bad kumjuh ruh ka jingma bad jingjia ba sngewsih kaba lah ban jia ha kano kano ka por.
Ha kane ka sngi la sakhi ruh da ka jingdonlang u Bah Mayral Born Syiem MLA ka Nongpoh kum u kongsan, u VS Rathore Senior Superintendent of Police ka Ri-Bhoi, u Bah Orville Massar Additional SP, Bah J Lyndem EE PWD Nongpoh Division, ki ophisar naka tnad DTO, ki nongïalam ka NMMDF lem bad ki paidbah bad ki nongñiah kali.
Khnang ban pynsngewthuh kham shai sha ki nongñiah kali, ki pulit ka Ri-Bhoi kila pynlong ruh da ka mock drill ban pyni ba kumno ki nongñiah ki dei ban tip ïaki aiñ ñiah kali kumba ki pulit ki ju hikai bad talasi naka por sha ka por, ban lait na kano kano ka jingmynsaw bad ka jingjia ba sngewsih, khamtam hadien bun snem ka jingud jong ki paidbah halor ka jingsniew u surok Nongpoh Umden mynta ka kam kala ïaid shaid shaid bad shen kin sa siang rong noh ha kaba bun naki paidbah kila sdang ban pynher sted khamtam ki kali kamai khlem da kheiñ snep bad burom lang ïa kiwei.
Haba kren ha kane ka sngi naka liang u Bah Mayral Born Syiem u la ong ba kum kine ki jinghikai ki long kiba kongsan namar ka surok Nongpoh Umden Sonapur kam slem shuh ban dep, kumta donka ban burom ïaki aiñ ñiah kali ban lait na kino kino ki jingjia ba sngewsih namar bunsien ki paidbah kim kheiñsnep bad kum burom wat hadien ba kila tip shai ba kadei kaba bakla.
U la ong ruh ba bun ki jingjia aksiden kiba khah khah ki dei namar ka jingthurmur bad bun ki daw, hynrei kum ki paidbah kiba ñiah kali naduh ki kali kamai, ki kali shimet, ki kali kit mar ba ki dei ban burom ban kiar naka jingpynher sted bad ñiah kali bad u bilor kyiad khnang ba ki surok kin long kiba shngaiñ.
