Khliehriat, Jymmang, 30: Ka jingther jong u lapbah uba jur ka la wanrah ïa ka jingtwa khyndew ha kiba bun ki bynta ha ka surokbah National Highway-6 ha Narpuh, East Jaiñtia Hills District bad kane ka la pynthud ruh ïa ka leit ka wan jong ki kali kiba ïaid lyngba na kane ka surok.
Ka jingtwa khyndew ka la jia ha ka sngi Thohdieng ha ka por mynsngi ha ka thaiñ Ratacherra ha Dona bad ha kiwei kiwei ki jaka. Ki nongtrei jong ka National Highway Authority of India (NHAI) ki la shimkhia katba lah ban pynkhuid ïa ka khyndew bad ki maw kiba la hap ha surok.
U Deputy Commissioner, uba dei ruh u Chairman jong ka District Disaster Management Authority (DDMA) East Jaiñtia Hills District u Shivansh Awasthi u la kyntu ïa ki paidbah khnang ba kin lait na kano kano ka jingjia ba sngewsih namarba ka jinglong jingman ka suiñ bneng kam da shngaiñ bha ha kine ki khyndiat sngi.
Na ka daw ka jingjur jong u slap, ka jingtied u pyrthat, ka leilieh, ka jingjur ka lyer, u la bthah ïa ki paidbah ba ki dei ban long kiba husiar bad adkar bha haba ïaid ba ieng.
La bthah ba lada jur u slap ne ka lyer dei ban wad jaka rieh ha ki ïing briew kiba skhem lane ha kino kino ki kali kiba biang ki jingda bad dei ban khang ïa ki jingkhang ïit, dei ban kiar ban rieh slap ha ki ïingtrep ba shu shna malu mala, na ki iing jaiñ ne ki ing tap shiliang bad kiar ruh ban ieng ha trai dieng.
Dei ban kiar na kaba pyndonkam ïa ki tiar electronic kum ki telephone ba don wire kan bha lada pyndonkam da ki mobile phone bad kiwei kiwei.
La bthah ruh ba lada lap ïa ki sainar electrict kiba hap ha madan kiba la julor dei ban pyntip marmar sha ki bor ba dei peit.
La kyntu ruh ba dei ban kiar na kaba leit jngi ha wah, ban ieng halor lum bad ha ki jaka ba long madan bad na ki jaka ba don ki um ba tuid, kiar ban ieng hajan ki nar post electrict bad hajan ki Tower.
Katkum ka jingpyntip na ka India Meteorological Department (IMD) kan don ka jinghap slap ba jur ha ki jaka ha East Jaiñtia Hills, ha West Jaiñtia Hills, East Garo hills bad West Garo hills ha kine ki sngi ban sa wan.
